Gregory Mathilda, director EPB San Nicolas:
ORANJESTAD (AAN): Gregory Mathilda, director di EPB San Nicolas, den entrevista cu DIARIO a confirma cu Dialuna cu a pasa, a sosode un pelea hopi mahos pafo di scol.
Meneer Mathilda a bisa cu e situacion ta birando un poco mahos pafo di scol y semper scol ta haya cooperacion di Cuerpo Policial, pero aworaki esaki ta bayendo un tiki mas leu, unda nan ta bin cu arma y e no ta agradable mas.
“Mi ta bida cu e no ta agradable mas, pasobra tur mayor ta bin cu nan yiu na scol, nos ta trece nan, ta zorg pa nan, aki aya por tin un friccion entre e muchanan cu nos ta purba di resolve, nos ta concentra riba e materia di estudio pa nan, pero despues di scol, mi ta kere, tambe ta bunita pa tur hende yega cas nechi cu por tin e trankilidad pero e dianan aki no ta eherciendo e trankilidad akinan”, Meneer Mathilda a comenta.
“Mi kier a haci un yamada pa por fabor ban yega na un areglo guys, cu bringamento, cu batimento na otro no tin solucion. Nos a habri aworaki 2024, ban cu diferente meta, ban laga nos desacuerdonan, e rabianan kizas, cu nos tin contra otro, tin un motibo of otro, ban busca un solucion, ban laga atras, ban pa un area nobo”, Meneer Mathilda a enfatiza.
El a subraya cu esaki ta mensahe di loke e kier a pidi, y a pidi comunidad seguramente, cu si nan wak algo rond di scol cu no ta corecto, por fabor yama polis, acerca scol. “Nos ta poniendo extra seguridad wak con esaki por yega na un trankilidad pa no studiantenan, tambe pafo di scol”, Meneer Mathilda a señala.
El a aclarea cu e problema cu a sosode Dialuna no ta uno di e alumnonan di EPB San Nicolas, pero ta mustra den video cu na cierto momento ta un otro grupo di otro scol a bin enfrenta, y tin biaha ta otro muchanan cu kizas tin otro tipo di metanan anto ta bin scol na momento e mucha ta caba, ta ataca.
El reitera su yamada pa comunidad si nan mira algo interveni door di yama scol, polis, pa busca un solucion y bolbe trece trankilidad.
