Parlamentario Ricky Hoek (MEP):
ORANJESTAD (AAN): Ultimamente Minister di Turismo y Salud Publico a haci conoci e cifranan record di turismo pa aña 2023. Un aña cu a kibra tur expectativa relaciona cu e recuperacion di turismo na nos pais Aruba, asina Parlamentario di MEP, Ricky Hoek a declara.
Despues di e pandemia di covid-19 na aña 2020, turismo na Aruba a cay drasticamente y esey tabata tin un efecto hopi grandi riba e economia di Aruba. Principalmente, tur nos famianan cu ta depende tanto directamente como indirectamente di turismo.
Bon maneho y record
E ta sigui bisa cu sinembargo, pa Aruba por a recupera di e pandemia cu a afecta nos economia por completo, mester a bin un maneho y vision cu lo a atende na mehora tur e facetanan di e industria turistico.
Di e manera ey, Minister Oduber di Turismo hunto cu ATA y otro partnernan den turismo, a fiha un maneho concreto con structuralmente lo mester traha na e recuperacion di nos industria principal cu ta turismo.
Den 3 aña di tempo, e maneho aki a duna un resultado sumamente positivo compara cu otro islanan den region cu ta un competencia grandi pa Aruba.
Asina Aruba den 2023 a kibra record cu un total di 1,243,55 turista cu a bin bishita nos isla y a keda drumi sea un of mas anochi riba Aruba.
Pa e categoria di crucero, tabata tin un cantidad di 817, 670 bishitante cu seguramente algun di nan lo desea di bolbe bishita nos isla pa un temporada mas largo.
Esfuerzo colectivo den e industria turistico
Pa Aruba por a kibra e recordnan menciona den turismo, esaki ta implica un esfuerzo colectivo di tanto gobierno di Aruba, partnernan den turismo, pero mas importante ta e ciudadano cu ta traha sea directamente of indirectamente den e industria turistico.
Segun Ricky Hoek, ta abase di e esfuerzo y determinacion y hospitalidad di nos Arubianonan, nos por a marca un diferencia grandi den e crecemento turistico.
Aruba ta keda un destinacion faborito den Caribe, netamente pasobra su hendenan ta haci e diferencia den e calidad di servicio cu nos ta ofrece na nos bishitantenan.
"Como representante di pueblo, mi kier a gradici tur persona cu ta haci nan maximo esfuerso pa eleva nos industria turistico, pero tambe pa nos conserv’e y cuid’e cu hopi atencion", Hoek a finalisa bisando.
