Awe di 7’or di mainta pa 1’or atardi:
ORANJESTAD (AAN) – Minister Ursell Arends, titular di Transporte, Naturaleza, Integridad y Asunto di Adulto Mayor, a yama un conferencia di prensa diabierna 19 di Januari awo, pa duna informacion tocante e inicio di e proyecto “Syntropic Agroforestry” unda cu scolnan participante, lo haya sosten tanto di Santa Rosa como di Living Soil y di Gobierno.
E dignatario a splica cu e proyecto aki su meta ta pa bin cu un hardin cu ta provee alimentacion y asina aki inculca e valor pa loke ta agricultura den nos futuro generacion, pa medio di tecnicanan sostenible.
El a splica cu Ministerio di Naturaleza ta trahando conhuntamente cu Santa Rosa y Living Soil, den e proyecto aki, p’asina duna guia y sosten na scolnan, y tambe pa loke ta trata e materialnan pa haci e proyecto aki posible.
Arends a indica cu ademas, e personal di scolnan y tambe boluntarionan lo ricibi training p’asina nan ta mas informa y prepara pa loke ta e tecnicnana di Agroforestry, tanto pa mantencion, cuido y plantacion matanan y alavez ta bay haci e parti di integracion di esaki den e curriculum escolar.
“Aña pasa, dia 1 di November, nos a lanza e proyecto aki y e plataforma pa duna oportunidad na scolnan basico pa por a registra y participa den e proyecto aki. E plan tabata pa scoge un total di diez scol basico, pero mirando cu un cantidad grandi di scol a registra y participa, a scoge e ora ey pa un total di 13 scol wordo scogi. Nan ta 12 scol basico y IPA”, e dignatario a splica.
El a menciona e scolnan cu lo participa y ricibi e proyecto aki ta: Scol Basico Washington, Scol Primario Kudawecha, Colegio Hilario Angela, Colegio Conrado Coronel, Pius-X Scol, Scol Caiquetio, Sint Paulo Scol, Play 2 Wizz Campus, Scol Basico Dorna Sol, Scol Paso pa Futuro, Mon Plaisir Scol, y tambe Graf V Zinzendorf Scol. Instituto Pedagogico Arubano tambe ta bay participa pa conoce e maestronan, e tecnicanan di Syntropic Agroforestry, y e parti di importancia pa loke ta trata sector primario, pa conhuntamente cu e maestronan cu ta den preparacion pa guia nos futuro generacion y nan tambe por inculca e importancia di agricultura den nos futuro generacion.
E mandatario a duna di conoce cu e prome scol cu ta bay ricibi e hardin di alimentacion, ta Scol Basico Washington, cu lo tuma lugar awe, Diasabra 20 di Januari. E proyecto aki ta cuminza di 7’or di mainta te 1’or di merdia, y e training y plantamento lo core den henter luna di Januari te Juni 2024.
“Di awo caba mi kier haci un yamada na henter e comunidad di Aruba, pa hunto ban contribui, ban yuda, ban ta boluntario na e proyectonan aki, mayornan tambe por participa, p’asina aki nos por crea e hardinnan di alimentacion na e 13 scolnan aki”, e dignatario a expresa.
El a extende un invitacion na comunidad di Aruba pa bin participa, di 7 or di mainta te 1’or di atardi na Scol Basico Washington pa yuda crea e hardin di alimentacion.
