Sistema di Alarma pa Aruba 'Early Warning System Aruba' ta logra avance significante

Crisis Management Office Aruba:

*E proyecto ta ariba bon caminda pa entrega un sistema di Alarma di tecnologia avansa 

ORANJESTAD (AAN):  E Sistema di Alarma pa Aruba, un iniciativa di colaboracion entre Crisis Management Office Aruba, RESEMDID, Union Europeo, y Expertise France ta logrando avance remarcabel riba nan meta di mehora e preparacion y responde na cualkier desaster riba e isla.

            Cu un fecha operacional planea pa Maart 2024, e proyecto ta ariba bon caminda pa entrega un sistema di Alarma di tecnologia avansa.

            Augustus 2023 a marca un luna crucial pa e Sistema di Alarma pa Aruba, cu varios logro importante: 

Estudionan di necesidad pa e rapport di demografia y risiconan di Aruba: 

            Na Augustus, e proyecto a ehecuta un estudio amplio di necesidad pa e rapport di Baseline, cual ta un rapport cu ta tocante e demografia y risiconan di Aruba actualisa.

            E paso critico aki den desaroyo di e proyecto tabata pa identifica e rekisitonan specifico y retonan cu mester wordo atendi pa construi un sistema di Alarma robusto pa Aruba. E proceso di evaluacion awor ta wardando e rapport final, cu lo duna conocemento valioso pa progreso den futuro proyectonan.

Estudio di optimalisacion: 

            Un otro estudio esencial cu a conduci durante Augustus tabata e Estudio di optimalisacion.

            E estudio aki a enfoca riba instalacion y operacionalisacion di un sistema basa riba Protocol di Alerta Comun (CAP) y e identificacion di luga adecuado pa instalacion di sirenanan y instalacionnan activa pa voz. E hayazgonan for di e estudio aki lo hunga un papel central pa sigura eficiencia y efectividad di e sistema.

            E siguiente reto importante di CMO pa e Sistema di Alarma pa Aruba ta e preparacion di e bestek pa Hardware y Ekipo pa e sistema di Alerta di voz/Publico (VA/PA). E dia di bid aki ta planea pa 1 di October 2023, y esaki ta representa un oportunidad pa companianan local y internacional participa den e proyecto door di suministra e hardware y ekipo esencial.

            E Sistema di Alarma pa Aruba ta compromete na stimula participacion local y cooperacion durante e desaroyo. Door di envolve companianan local den e proceso di adkisicion, e proyecto tin como meta crea un infrastructura di alarma  robusto y sostenibel cu ta beneficia tanto e habitantenan como negoshinan riba e isla.

            E desaroyonan recien aki ta demostra e dedicacion di CMO pa progreso conhunto cu tur partnernan involucra . E Sistema di Alarma pa Aruba lo continua traha sin descansa pa mehora resistencia na desaster y sigura e siguridad y bienestar di comunidad Arubiano.

            E proyecto innovativo y actual aki di Oficina di Maneho di Crisis Aruba, cu ta ricibi sosten for di RESEMBID, financia pa Union Europeo y implementa pa Expertise France ta dedica na mehoramento di siguridad y resistencia di comunidad Arubiano.