Sinterklaas y mas di shen Piet ta yega Aruba diadomingo 15 di november

ORANJESTAD (AAN): E tradicion anual di yegada di Sinterklaas na Aruba ta acerca un biaha mas.

Diadomingo 15 di november 2026, Sinterklaas y su Pietnan lo yega na nos isla pa un celebracion cultural y familiar cu durante añanan a forma parti di e calendario di actividadnan na Aruba.

Durante un conferencia di prensa teni awe mainta, e comision organisador a brinda comunidad informacion tocante e preparacionnan, e programa oficial y e diferente actividadnan cu lo acompaña e yegada di Sinterklaas. E celebracion di e aña aki lo inclui e tradicional yegada na waf, un recorido festivo den centro di Oranjestad y un programa di entretenimento dedica specialmente na nos muchanan.

Gobierno di Aruba, Comision Celebracion Dianan Nacional di Aruba (CCDN), Departamento di Cultura (DCA) y UNOCA ta invita tur mayor y mucha pa forma parti di e celebracion y yama Sinterklaas bonbini na Aruba.

Yegada di Sinterklaas na Aruba Ports Authority

E programa lo cuminsa na terminal di Aruba Ports Authority (APA), caminda Sinterklaas lo yega den su barco acompaña pa mas di shen Piet.

E portanan di Cruise Terminal, Gate 5, banda di Welcome Plaza, lo habri pa publico for di 2:00 PM, brindando famianan oportunidad pa reuni y prepara pa e momento di yegada.

Segun e programa presenta, e barco di Sinterklaas ta proyecta pa drenta waf pa 3:00 PM. Despues di su yegada, Sinterklaas y su Pietnan lo baha for di barco pa continua cu e siguiente parti di e celebracion.

E momento aki ta tradicionalmente un di e puntonan mas special di e actividad, caminda muchanan y nan famianan ta reuni pa mira e yegada di Sinterklaas y participa den e ambiente festivo.

Recorido festivo cu tram den centro di Oranjestad

Despues di su yegada na waf, Sinterklaas y su Pietnan lo subi e tram di ARUTRAM pa un recorido special den centro di Oranjestad, acompaña pa musica y show di Pietnan.

E recorido lo cuminsa na Welcome Plaza y sigui e ruta di tram pasando patras di Arubus na Weststraat, despues Havenstraat y Kazernestraat, pa finalmente drenta Caya G.F. Betico Croes.

E caravana lo culmina dilanti di Djispies Place, na Plaza Nikki Habibe, caminda e siguiente parti di e programa lo tuma luga.

Cu e recorido aki, e celebracion lo extende for di area di waf te den centro di ciudad, creando un ambiente festivo durante e traslado di Sinterklaas y su acompañantenan.

Programa special pa muchanan na Plaza Nikki Habibe

Ta proyecta cu e caravana di Sinterklaas lo yega na Plaza Nikki Habibe pa 4:00 PM, caminda un programa varia di entretenimento lo ta prepara pa muchanan y nan famianan.

E actividadnan lo inclui presentacionnan di baile, show, weganan popular pa mucha y oportunidad pa saca potret cu Sinterklaas.

Ademas, lo tin un variedad di tent caminda bishitantenan por cumpra cuminda y bebida, pa asina famianan por disfruta di e celebracion den un ambiente agradabel.

E programa na Plaza Nikki Habibe ta programa pa continua te 6:00 PM, marcando e final di e actividadnan oficial di e dia.

Recomendacionnan importante pa mayornan

Considerando cu e celebracion ta tuma luga durante oranan di atardi y ta spera presencia di hopi famia cu mucha, e comision organisador ta haci un yamado na mayornan pa tene cuenta cu e bienestar y siguridad di nan yiunan.

Ta recomenda pa prepara debidamente pa e calor y exposicion na solo, incluyendo proteccion solar y suficiente bebida pa mantene e muchanan refresca.

Tambe ta importante pa tene cuenta cu e nivel di zonido durante e actividadnan, specialmente pa muchanan cu por ta sensitivo pa musica duro, y pa presta atencion special na trafico y multitud durante e recorido y na e diferente localidadnan.

E comision ta pidi cooperacion di tur bishitante pa contribui na un celebracion agradabel y sigur pa grandi y chikito.

Un tradicion cu ta reuni famianan

Yegada di Sinterklaas ta un celebracion cu cada aña ta reuni diferente generacion na Aruba. Pa hopi mucha, e momento di mira Sinterklaas y su Pietnan yega den barco, sigui e recorido y participa den e actividadnan ta forma parti di e experiencia y emocion di e temporada festivo.

Cu e programa di e aña aki, organisadornan ta busca mantene e tradicion bibo y brinda un oportunidad pa famianan comparti un atardi di alegria, entretenimento y convivencia.

Gobierno di Aruba, CCDN, DCA y UNOCA ta extende un invitacion cordial na tur famia pa participa na e yegada di Sinterklaas diadomingo 15 di november 2026.

Diadomingo ta dia di famia: bin cu e muchanan y disfruta hunto di e yegada di Sinterklaas na Aruba!