Segun Frans Ponson di CUA:
- Eman a dicta sin dialoga prome cu gremio y sindicatonan
ORANJESTAD (AAN): Señor Frans Ponson, Presidente di Comerciante Uni Aruba (CUA), durante un rueda di prensa Diamars mainta, e duna di conoce cu Prome Minister Mike Eman ta tilda comerciantenan cu nunca nan kier sinta pa dialoga. Detayadamente señor Ponson a prueba cu esaki no ta berdad, kitando tur duda ken ta esun cu ta gaña den e caso aki.
El a cuminsa pa bisa cu enberdad riba 17 di Februari, via un email, CUA a ricibi invitacion di Gobierno pa un dialogo cua lo a tuma luga dia 18 di Februari, un dia despues. CUA no tabatin tempo pa lesa y studia e documentonan den un tempo cortico asina. Gobierno a cambia e fecha pa e fin di siman siguiente. Pero, CUA considerando cu e ta algo serio pa nos pais, nan no a bay riba e fecha ey tampoco pasobra no tabata suficiente tempo pa prepara.
Ademas, segun Ponson, Gobierno no mester sinta cu gremionan na momento cu e kier tuma decision, pasobra Gobierno ora cu e kier, ta traha ley hunto cu su ministernan y ta pasa e ley, sin tene cuenta cu gremio sindical of comercial. E ta enfatisa, cu un dialogo ta ora cu Gobierno kier sinta cu tur gremio y sindicato pa hunto yega na un acuerdo.
El a menciona cu dia 12 di Maart, gremionan comercial a manda carta pa Gobierno indicando kendenan ta representa nan. Na April 16, tur gremio comercial a manda nan puntonan pa Gobierno. Sindicatonan y Gobierno tambe a manda nan puntonan.
Ponson a indica cu mientras cu discucionnan tabata tumando luga entre sindicatonan, gremionan y Gobierno, Prome Minister Mike Eman a sali y anuncia publicamente cu nan lo hisa salario minimo y mara esaki na e bestaansminimum, esaki sin ningun dialogo.
Ponson a menciona cu den e reunion cu gremio, sindicato y Gobierno, Prome Minister a bay off y a grita Ponson. Pero loke mas a indigna señor Ponson ta e expresionnan di Prome Minister Eman a haci den reunion cu gremio y sindicatonan, bisando cu e no tin mester di gremio comercial pasobra e por dicidi sin nan.
Segun e, Prome Minister no a yama Gremio y Sindicatonan pa un dialogo sino pa un momento di potret, pasobra ya Eman tabata sa caba kico ta e decision cu e lo tuma, esta cu lo hisa salario minimo y mara esaki na e bestaansminimum.
Mientras tanto, Ponson a bisa cu un dialogo responsabel, lo tuma mas di dos luna pa bin cu un solucion di berdad. E lo tuma mas di e tempo cu Eman lo baha di su cargo como prome minister.
“Pero e berdad ta, cu no ta berdad cu gremionan y sindicatonan no kier sinta na mesa manera cu Prome Minister a bisa. E berdad ta, cu Prome Minister a tuma decision caba sin dialoga, pasobra segun Eman, e no tin mester di sector comercial pasobra e ta dicta toch”, Frans Ponson a expresa.
