Sint Paulus School ta organisa awe un 'vlooienmarkt' pa recauda fondo

ORANJESTAD (AAN):  Cabezante Randy Arends di scol basico St. Paulus School na San Nicolas, a duna di conoce cu awe Diasabra 6 di November nan lo tin un ‘vlooienmarkt’ pa asina recauda fondo.      

         El a indica cu e cortamento di gasto tur caminda, a debilita entrada di e scol aki tambe y esaki ta stroba hopi e desaroyo di e diferente proyectonan cu nan tabata ehecutando y cu a keda pega pa mas o menos un aña.

            Locual mester a haci ta bira creativo y a dicidi di organiza un evento pa recauda fondo pa asina e scol por sigui cu su proyectonan innovativo pa enseñanza.

            Sint Paulus School tabata un di e prome scolnan cu a cuminza implementa instrumentonan digital den klas, incluyendo uso di laptop computer tipo Chrome Books, etc. Tin mas di dies aña caba ta usando tecnologia den klas.

            Arends a laga sa cu tur esaki a bin riba nan propio forsa y fondonan cu nan ta genera danki na e mayornan y tambe comercio cu ta yuda bastante.

            Aworaki loke e scol kier sigui cu ne ta amplia e uso di Chrome Books den klas 4. El a agrega cu e pandemia a bin, pero e procesonan na scol tin cu sigui y un manera pa genera fondo ta organisa e tipo di eventonan aki.

            E scol tin dos aña bezig cu e renobacion den enseñansa aki. A cuminsa cu klas 6, a sigui cu klas 5 y awor kier bay klas 4 tambe. E meta ta pa yega te derde klas cu e Chrome Books. Tin cu siña e muchanan deal cu tecnologia, a enfatisa.

            Sint Paulus School ta situa net pariba di Joe Laveist Sportpark y e vlooienmarkt ta cuminsa 9 am y ta caba 2'or di atardi.

            Lo tene cuenta cu e medidanan di Covid-19 y uso di tapaboca.