Sindicatonan ta confirma nan marcha diamars 24 di Mei

ORANJESTAD (AAN):   Diabierna mainta, e lidernan sindical den union (SIMAR, SEPPA y SADA) a yama un rueda di prensa rond di e desaroyonan tocante e recorte di 12.6% di salario di empleadonan publico.

Edward Maduro di Sindicato di Douane (SADA) a habri e conferencia di prensa expresando cu otro siman ta bay tin un marcha silencioso ("di pueblo") riba diamars 24 di Mei pa 3 pm na ex DOW direccion Bestuurskantoor unda lo pasa dilanti  pa finalisa na e rotonde di Las Americas (dilanti di JFK Center).

Nan meta ta pa mustra e mal contento bao di nan miembronan directo, pero cerca esnan cu di un manera of otro a wordo afecta door di e situacion.

Mirando cu Secretario di Estado Alexandra van Huffelen lo ta na Aruba otro siman, e sindicatonan a pidi un audiencia cu ne pa asina delibera riba nan posicion, asina Maduro a indica.

A pesar cu gobierno a haci e anuncio tocante e eliminacion di e 12.6% di salario, toch e sindicatonan ta sinti cu gobierno no a duna nan ningun informacion relaciona cu e punto aki.