ORANJESTAD (AAN): Jasmira Mora tambe ta spera cu awe for di 8:00 am te cu 12:00 pm, lo bay tin hopi hende cu lo acudi na Centro Kibrahacha pa check nan presion di sanger y nan sucu cu un control gratis.
Esaki lo ta den man di esnan di POH di Wit Gele Kruis. Y manera ta conoci, esnan cu ta trahando como POH na diferente Consultorio di Docter na Aruba, ya ta disfruta di hopi confianza di pashentnan.
Personal di POH ta duna extra atencion na cada pashent, pa asina nan duna nan guia nunca antes obtenible, pa atende nan malesa di sucu, of nan malesa di curazon, of kizas tur dos hunto.
Jasmira Mora a bisa cu awendia no ta djis cuenta di dunabo un pildora pa bay cas, y bebe esaki ban spera bo cura! Awor e personal di POH ta sinta cu bo, pa deduci con bo a yega haya e malesa cronico, y dunabo guia con pa cambia bo dieta, con pa bin cu un estilo nobo di bida, y ta haci diferente control cada rato na bo curpa.
E ta un chens unico pa e pashent conta e POH exactamente kico ta pasando na cas, pa asina trata na haya sa kico ta e origen di problema, cu diripiente presion di sanger ta halto atrobe.
“Nos ta purba di saca afo kico ta e origen di e problema, anto asina nos tin un strategia mihor pa yuda e pashent pa nan por tin control riba nan sucu y presion halto,” Mora a indica durante un conferencia di prensa na Centro Kibrahacha.
E POH no ta para keto, como cu nan ta keda avanza y ta keda haya por lo menos 1 biaha pa luna (minimo 6 biaha pa aña), nan ta haya lesnan clinico. Nan ta haya les di Hulanda, y esaki ta yuda pa nan keda up to date.
Tin Docternan cu ta bin Aruba y duna esnan di POH un lectura tambe di desaroyonan di remedi, y pa nan e ta importante kico nan por ofrece pashentnan y asina ta sigur cu tur loke nan tin ta cuadra cu e trend.
“Nos ta apoya tambe na bienestar di Aruba, y no ta tur Docter di Cas tin un POH. Pesey 2x pa aña nan ta haci un actividad cu ta habri pa henter pueblo di Aruba. No djis pa esnan cu tin POH, pero tambe pashentnan cu no tin POH,” Mora a indica.
El a bisa cu bo no mester traha cita! Djis acudi awe Diasabra mainta for di 8:00 am te cu 12:00 pm na Centro Kibrahacha, pa haya atencion mesora. Bo ta haya informacion, y lo traha cu IBiSA pa asina duna mas hopi hende posible.
Ademas di presion y bo sucu, lo check bo peso y e circumferencia di bo barica.
