Rene Bernabela, lider di TOPA:
ORANJESTAD (AAN) — Presidente di Sindicato TOPA, Rene Bernabela, a reitera cu durante e crisis causa pa e Pandemia di Covid-19, Aruba tabata tin mester di sosten di likides di Hulanda, y naturalmente, esaki a bin cu condicion, y gobierno a informa e sindicatonan di esaki.
El a remarca cu Gobierno hasta a bisa cu por tin un solucion si tur e sindicatonan sinta na mesa hunto pa e luna di Juni 2022, cu por cierto gobierno tabata tin e intencion di paga e mitad di e 12.6% e aña aki, anto e otro mitad na 2013.
“Pero ni asina, mi ta kere, e sindicatonan no kier a scucha, pasobra nan a keda tira culpa riba gobierno cu nan kier e 12.6% completamente den nan salario bek”, el a reitera.
Bernabela a bisa cu e sentencia di Huez, alomenos pa dos sindicato ta marca historia di locual awe por wak, y cu ta pone un mancha hopi scur riba e mundo sindical na Aruba.
“Akinan mi no ta bay culpa e lidernan sindical, di locual e sentencia aki ta bisa, pero mi ta culpa e miembronan di e sindicatonan. Pakico? Pasobra mi ta kere cu como miembro di sindicato, semper y cuando abo ta esun cu mester sa haci bo preguntanan di un forma corecto. No tabata tin un miembro di un sindicato aki na Aruba, cu mientras nos tabata den pandemia no tabata na haltura di kico tabata sosodiendo akinan y no tabata conciente, di loke Aruba tabata hayando na e momento ey pa locual tabata e sosten financiero di Hulanda”, Bernabela a subraya.
El a agrega cu, cu otro palabra, e sindicatonan mester a keda calmo y cu cabes frio pa asina, en todo caso, por a yega na un solucion. El a señala cu cada rato sindicato TOPA tabata haya yamada y e pregunta ki dia TOPA ta bay uni na e otro sindicatonan pa bay den accion.
“Mi ta bisa, si sindicato TOPA a join e sindicatonan aki, anto awe e sentencia aki lo a conta tambe pa nos. TOPA semper a opta pa dialoga, y semper TOPA lo keda opta pa dialoga. Sindicatonan por keda wak e interes di nan miembronan, den e caso aki, pero mester compronde cu gobierno tin cu wak e interes di un comunidad completamente di Aruba”, e lider di Sindicato TOPA a remarca.
