Gobierno di Aruba ta orguyoso cu 24 ciudadano a worde condecora

Minister Evelyn Wever-Croes:

ORANJESTAD (AAN): Como un costumber caba, cada aña na ocacion di celebracion di Aña di Rey, Comision Condecoracion Real Aruba a organiza e evento na unda ciudadanonan cu a destaca den comunidad a bin na remarke pa ricibi un Condecoracion Real.

   Gobierno di Aruba no tin ningun rol den e decision pa Condecoracion Real pero semper ta encurasha nos comunidad entrega mas proposicionnan di ciudadanonan cu a descata compara cu e añanan anterior.

   Diamars mainta a tuma luga e Ceremonia di Condecoracion Real den Grand Ballroom di Marriott Hotal na unda cu Gobernador di nos Pais, Su Excelencia Alfonso Boekhoudt a condecora 24 ciudadano di Aruba cu den diferente sector a contribui boluntariamente na Pais Aruba.

   Prome Minister den nomber di Gobierno di Aruba y henter nos comunidad ta felicita cada condecorado cu a ricibi nan condecoracion y ta gradici cada un pa e trabao importante cu nan ta haci di curazon pa nos comunidad.

   “Mi ta convenci cu tin hopi hende mas na Aruba cu merece un condecoracion. Tin hopi hende na Aruba cu ta traha boluntariamente pa yuda otronan, pa hopi aña, sin pidi nada a cambio. Esaki ta locual Rey Willem Alexander kier reconoce cu e condecoracionnan aki. Ohala cu e condecoracionnan aki por stimula mas trabao boluntario den nos comunidad. Kico lo ta di Aruba sin boluntarionan? Danki pa boso trabao, tempo y amor di traha boluntariamente pa nos pais. Nos ta orguyoso di boso”, Prome Minister Evelyn Wever-Croes a duna di conoce