Minister di Enseñanza Endy Croes a haci anuncio oficial di renovacion di Sint Aloysiusschool

ORANJESTAD (AAN) – Dialuna di e siman aki, a cuminza cu un noticia hopi positivo,

duna pa Minister di Enseñanza ken a anuncia, oficialmente, e proyecto di renovacion di Sint Aloysiusschool, situa na Noord (den e cura di Misa).

E mandatario a comenta cu e scol aki tin un par di aña cera, y e tin mas 180 alumno. “Nos ta sinti cu ta necesario pa aloca e fondonan den e presupuesto di gobierno, den colaboracion tambe cu SKOA, y esnan cu a haci e diseño cu ta D.O.W y cu lo participa den e area di speelplaats cu lo wordo reconstrui”, e minister a menciona.

E dignatario a expresa cu mas cu claro e fase 2 ta un gymzaal, pasobra tin un renovacion total di e scol, pues e hala noord, e hala zuid, e parti di oficina, speelplaats, y den e fase 2 un gymzaal ta na su lugar.

Minister Endy Croes a bisa cu esaki ta un logro bunita di Gabinete Wever-Croes-2. E preparacion tin lunanan, desde cu Croes a drenta den gobierno.

“Y awe ta e dia cu nos ta lanza oficialmente y dentro di diez pa diesun luna e proyecto aki lo wordo entrega”, e mandatario a bisa. El a comenta cu e ta mirando e parti practico, scucha, tuma accion, soluciona, cu determinacion y asina pone e proyectonan aki cana y esey ta tumando lugar, actualmente. “Cu e fondonan limita cu nos tin, nos ta purba haci milagro. Nos tin mas scol pendiente cu mester di atencion, tin hopi scol cu ta pafo di nan edificio, y esey ta scolnan cu den mi concepto mester haya atencion primordial, entre otro Reina Beatrix School, Juliana School, Frere Bonifacius, Maria Dependance. Asina tin mas scol cu ta fuera di nan edificio y gobierno lo percura pa nan haya atencion segun un lista di orden, pa por logra esaki, segun palabranan di e titular di Enseñanza.