ORANJESTAD (AAN): Diahuebs mainta trahadornan di Setar NV a tene un walkout na e edificio principal, como cu nan ta disgusta cu lo drenta 2022 ta sigui cobra 12,6% menos riba salario.
Pa haya claridad a sali for di trabao, y dado momento a ricibi sosten y apoyo moral di otro Sindicatonan local.
Nan tur a mustra cu en general trahadornan publico ta sinti cu nan a contribui suficiente caba cu e emergencia causa pa e pandemia, y nan no ta kere cu 2022 por sigui ta kita e porcentahe aki for di nan salario.
Y ya caba Sindicatonan ta fulando tera pa mira si tin suficiente sosten, pa un posible Welga Nacional den futuro cercano, pa asina na un forma masal por expresa e disgusto na un forma mas comprendible den direccion di Gobierno.
Trahadornan publico no ta guli manda abao facilmente e splicacion cu Gobierno ta dunando relaciona cu e 12,6% reduccion aki, y esaki a bira aun mas grave ora cu Secretario di Estado Raymond Knops a bisa cu hamas Hulanda a yega di sugeri gobierno di Aruba pa implementa e reduccion di salario aki.
