ORANJESTAD (AAN): Minister Geoffrey Wever tabata enfatico durante e conferencia di prensa cu el a convoca diahuebs mainta unda el a bisa cu gobierno di Aruba no por treck-in e recorte di salario di 12,6% di e empleadonan publico.
El a reitera cu esaki ta un condicion di Hulanda pa Aruba haya e sosten di likides. "Y nos mester di dje pa e prome kwartaal di 2022 sigur".
Wever a agrega cu segun Minister di Finansas, ta casi sigur cu Aruba no ta bay hay'e pa e lunanan benidero. Pero pa e prome kwartaal di 2022 pais Aruba ta bay tin mester di e sosten di likides.
Na momento cu Aruba dicidi di revoca e decision cu Hulanda a impone pa haya e sosten di likides, lo ta den incumplimento, e mandatario a remarca.
"Tumando un decision asina (...) lo tin efectonan drastico pa nos pais y esey ta algo cu mi no ta kere cu ta responsabel pa haci na e momento aki", Minister Wever a bisa.
El a enfatisa si cu den tur caso tin un bon consulta cu Hulanda.
Pa loke ta e caso di ELMAR, a bisa cu loke e tin entendi ta cu nan a haya un 'signing bonus' pa via cu nan a para nan CAO, pero cu e 12,6% si a keda contribui.
E ta un analisis financiero cu no ta hopi complica, pero cu mester haci. Pesey a pidi e sindicato di SETAR pa duna gobierno espacio pa por tuma un decision bon considera, Wever a expresa.
