Ministerio Publico y instancianan di control por duna tur informacion --- *Bandera di corupcion a bay halto y Hulanda mester a stop abuso di placa --- *A lanta para contra ex Ministronan y Miembro di Parlamento deteni?
ORANJESTAD (AAN) — Placa a caba na Aruba. Pasobra no tin placa mas, mester baha gastonan di Aruba.
Esaki ta e realidad prome cu e Coronavirus nobo a bati na porta y Aruba a keda sin entrada pasobra e mester a cera su economia cu ta produci placa.
Aparentemente sindicalistanan no ta comprende con Gobierno ta yega na placa pa paga trahadornan di Gobierno, cu ta trahadornan di Pueblo.
Awe nos mester resumi pa e sindicalistanan cu den un situacion mundial cu cada rato ta bira mas dificil, kico ta e berdad di Aruba cu no ta victima solamente di e coronavirus nobo.
Pero prome cu cuminsa cu e resumen di problema, nos mester lansa e pregunta si lidernan sindical cu ta wordo paga pa haci nan trabou, no ta kere cu nan mester ta capaz pa mira kico Pueblo por paga of laga di paga.
Con un persona por yama su mes lider sindical si e no ta capaz pa determina si un compania of un comunidad por paga loke e ta exigi pa nan paga?
Acaso un lider sindical no mester di e formacion necesario pa e por atende cu cifra?
Si ta mentira nos ta propaga of ta exigencia mucho halto nos ta presenta, nos mester lansa e pregunta si no ta berdad cu organisacionnan internacional ta exigi formacion di nan miembronan cu mester por atende cu cifranan pa asina comprende kico nan por exigi na mesa di negociacion.
DIARIO ta na haltura di e hecho cu un sindicalista cu kier sinta na mesa di negociacion, segun su formacion y exigencia di organisacionnan internacional di trahador na cual di Aruba tambe ta forma parti, mester por intepreta cifranan riba mesa.
DIARIO ta na haltura cu sindicalismo moderno ta exigi pa e sindicalista no solamente por organisa marcha riba caya, pero na prome lugar mester por analisa cifranan y situacionnan y asina instrui su miembronan di acuerdo cu loke ta cumbini nan.
E situacion cu Aruba conoce no ta debi na Covid-19 so y tabata presente mucho antes cu Prome Ministro Wever-Croes a bira Prome Ministro.
Awor sindicatonan a lesa rapportnan di entre otro Raad van Advies cu a splica kico lo pasa cu Aruba si Mike na 2009 a baha BBO cu mitar? Sindicatonan a exigi Mike Eman splica cu el a herida Aruba mortalmente y a mustra Mike Eman cu e no por sigui baha BBO, manera tampoco e por a haci?
Sindicatonan a subi caya ora Hulanda a presenta y a baha Mike Eman for di Zort Zoutman pa asina entrega Aruba loke a bira medida, cu ta haci cu awe mester baha salario di trahadornan di Gobierno?
Unda sindicalistanan tabata ora Comercio y instancianan importante a adverti pa proyectonan PPS y tabata adverti pa e forma cu debe nacional tabata subi?
Sindicalistanan a subi caya pa exigi Mike Eman pa sigui Ley y no sconde e Acuerdo di Citgo pa Parlamento?
Unda sindicalistanan tabata cada bez cu Mike Eman trapa riba Parlamento y haci loke e kier mientras debe di Aruba a sigui subi?
Unda sindicalistanan tabata ora na final di 2017, ningun experto of instancia por a bisa kico ta bay pasa cu Aruba cu tabata rehen di Nicolas Maduro?
Loke ta pasa na Aruba ta hopi serio.
Ministerio Publico mester splica sindicalistanan kico Fondo Desaroyo Nobo San Nicolas ta nifica pa Aruba.
Ministerio Publico mester splica sindicalistanan pakico Paul Croes a wordo condena y pakico Benny Sevinger tabata den detencion preventivo den prison y por bolbe prison.
Ministerio Publico por splica e rapport di Refineria di Aruba cu ta duna pruieba con ta fiesta cu placa di Pueblo.
Awe Aruba ta biba den e resultadonan di e Coronavirus mortal. Pero e sindicalistanan no ta sirbi como sindicalistanan si nan kier pretende cu for di 2009 nan a cera nan boca mientras futuro di Aruba a wordo destrui.
Awor cu Aruba ta na punto pa recupera, Mike Eman kier bolbe na poder pasobra Mike Eman mester di poder politico pa e ta importante.
Loke ta pasa na Aruba no tin nomber. Sindicatonan awe kier sinta den stul di Gobierno. Pakico?
Pa Gobierno splica nan, loke riba nan mes nan no por comprende? Awor con hende cu no ta comprende e seriedad di loke a pasa Aruba, por yama su mes dirigente?
Abuso ta loke un man yen di hende ta trata di logra pa destabilisa Aruba y stroba e pais yega na un futuro nobo!
