Nos zapato a rementa y nos no por a pone hierba pa cabay --- *Zwarte Piet no por tira moneda di chuculati pa e sindicalistanan? --- *Pakico bo no a hinca Mike den saco prome cu tram a come placa?
ORANJESTAD (AAN) — Bon dia San Nicolas. Nos a mira cu San Nicolas a yega.
Awe nos a dicidi cu ta cerca San Nicolas mes nos mester busca un solucion pa nos problema grandi. San Nicolas por yuda nos paga pa trahadornan di Gobierno?
Nos ta den problema serio San Nicolas. Ni pa e cabay di San Nicolas nos no tin hierba.
Situacion mundial a pone hasta nos zapatonan rementa na nos pia. Asina mes, San Nicolas situacion ta hopi malo.
Ta bon cu San Nicolas no ta di e mundo aki y no ta depende di situacionnan fastioso manera produccion y virus. Pero nos si San Nicolas ta pasa den mal rato pasobra virus a ataca nos despues cu Mike a haci hende kere cu e ta San Nicolas y a laga nos caha di placa bashi.
Nos no por comprende pakico San Nicolas no a hinca Mike den saco prome cu e tram a haya chens di come nos placa.
Nos a keda cu e problema pasobra Hulanda no ta kere den San Nicolas pero den placa riba mesa y den caha di Gobierno y a exigi nos baha gasto.
Nos ta den un situacion serio, San Nicolas y nos si no por huy bay Spaña prome cu wowo habri y tur hende mira cu ta nan mes mester paga pa e regalonan cu San Nicolas a pone na nos zapato kibra.
Asina Mike tambe a haci cu nos. Mike a gana hopi placa pa e cana tur dia riba caya brasa nos, hinca nos den mundo di aventura pa despues nos paga.
Awor Mike ta biba den Penthouse, halto den su nubianan cu poco hende tin placa pa paga y nos mester piki concha na baranca.
Si San Nicolas a hiba Mike Spaña, awe nos no ta den e problemanan cu nos tin y nos no ta haya nos cu un grupo di sindicalista, cu ta wordo paga dor di nan miembronan.
Aruba no tin placa pa paga belasting pa paga mas na trahador di Gobierno.
Trahadornan den Comercio mester a entrega placa. Un grupo di trahador a perde trabou y ta gobierno a paga pa nan keda na trabou, San Nicolas.
Pero Mike a keda den su Penthouse, San Nicolas y na su edad avansa a bolbe drenta Parlamento pa e por mira su back to back Benny.
San Nicolas, por yuda nos? San Nicolas por haci loke e sindicatonan di Gobierno kier pa nos haci sin placa, cu ta cuminsa paga full salario atrobe mientras pagadornan di belasting mes tin gusto di mira nan full salario?
San Nicolas, no rabia cu tur trahador di Gobierno. Ta un grupo di alrededor di cien hende tin ta causa problema pasobra nan kier bolbe pone Mike den tram pa e bay goberna pa asina fiesta sigui te ora pueblo keda sin sapato, sin carson, sin camisa.
Pero Mike ta keda den Penthouse.
Parce cu e sindicalistanan kier pa awe tur cos ta regla. Nan kier bula fuse di Aruba.
Pero nos ta entrega tur cos na San Nicolas cu mescos cu Mike por haci tur fantasia bira realidad basta e mes no paga.
