Huez a rechaza uzo ilegal di formulario di voto secreto den Corte --- *2021 ta cera sin ningun indicacion cu ta investiga posibel crimen --- *Base di gobernacion na Aruba a wordo viola durante eleccion 2021
ORANJESTAD (AAN) — 2021 lo no bira solamente e aña cu a entrega Aruba e realidad cu un candidato riba lista politico pa Parlamento a vota den prison y a wordo eligi como representante di Pueblo den Prison.
2021 no solamente lo wordo menciona ora papia di e hecho cu un Miembro di Parlamento di Aruba, Benny Sevinger, cualkuier momento por bolbe den detencion preventivo mientras cu na 2022 como Miembro di Parlamento e lo mester presenta dilanti Mesa Berde den sala di Corte pa responde pa acusacionnan sumamente serio manera corupcion y labamento di placa.
2021 no solamente lo wordo recorda pa e hecho cu e Vice Presidente di Parlamento, Alan Howell a wordo declara sospechoso den caso di malversacion di placa di fondo di Parlamento, loke a bira motibo pa Aruba bay eleccion na fecha adelanta.
2021 no solamente lo wordo recorda pa e hecho cu na e momentonan aki un trahador di Ministerio Publico tambe ta den problema cu autoridad.
2021 tambe mester wordo recorda como e aña cu den sala di Corte di Husticia a bini dilanti con e partido AVP a bay defende mantencion di informacion cu e mester a ricibi y cu e tabata usa pa pone preshon riba votador cu no a bay vota, pa bay vota.
2021 sigur mester wordo recorda pa e hecho cu despues di eleccion 2021 a bini dilanti den Corte di Husticia cu ley di secrecia di voto a wordo viola door di partido AVP y cu un acto criminal a tuma lugar.
Aki DIARIO no ta uza su palabranan pero DIARIO ta referi directamente na loke oficialmente a bini dilanti di parti di e partido mes pa loke ta trata e uzo di documentonan oficial cu tabata duna informacion na e partido cu por a bay busca hende, cu no a vota, pa bay vota.
Huez a mustra cu e no por a uza pruebanan di AVP pa exigi reconteo di voto pasobra e prueba cu AVP a presenta a wordo haya na un forma cu ta viola ley, loke pues ta criminal.
E pregunta a keda con por tabata posibel pa AVP por a publica y uza formularionan di voto di eleccion secreto pa bisa Huez cu e conteo di voto no tabata bon.
Esaki ta nifica cu e sistema di vota no ta proteha e votador contra resultadonan cu e por tin.
Ta hustamente pa evita cu un partido politico por practica persecucion politico contra un persona pasobra el a vota contra un partido, cu ta existi secrecia di voto pa garantisa democracia.
Te awe, te caminda cu DIARIO por a averigua, no tabata tin investigacion oficial di e forma cu AVP por a uza un portret (cu ta ilegal) di un formulario di voto como su prueba cu e votador no a yena e espacio cu e mester haci cora, bon.
Teniendo cuenta cu eleccion ta dicidi pa gobernacion na nomber di Pueblo, nos lo sigui exigi pa informacion wordo duna con ta atende cu e crimen cu a wordo comete ora resultado di eleccion secreto hasta mester a sirbi como prueba den Corte di Husticia, dilanti Huez.
