Edward Maduro di SADA:
ORANJESTAD (AAN): Un tema cu a keda colga for di 2019 ta e tema di indexering, segun Edward Maduro, Presidente di Sindicato di Aduana (SADA) a duna di conoce.
El a agrega cu SADA ta wak cu tin rumornan of indicacionnan hopi robes cu ta lantando stof na un manera cu ta poniendo tur e ambtenaarnan preocupa. Ta ser bisa cu gobierno lo kier stop esaki na 2024.
A agrega cu den e acuerdo bilateral tin un pasahe unda cu por ehempel, e premienan aki ta stop di subi na 2024, pero no ta caba. E pregunta cu ta surgiendo unda cu ta bisa cu na 2024 e premienan aki ta caba, cual esey sigur no ta berdad.
A splica cu e premienan aki ta gewoon indexering cu no a wordo paga den pasado y esaki a wordo hinca den un tipo di 'Inhaalmanoeuvre', mescos cu e ATV dagen. Tur aña ATV Dagen ta keda e 13 dianan. No por elimina e ATVnan sin mas pasobra ta placa cu gobierno lo keda debe e ambtenaar.
Esaki ta e mesun topico cu e 3 premienan aki pasobra nan a bin door cu e Inhaalmanoeuvre e tempo ey a wordo gefreeze door cu a keda debe e ambtenaarnan e indexering riba nan salario y door cu tanto tempo a pasa y no por a bin cu e indexering den salario pasobra e lo a bira impagabel pa gobierno, e ora a bin cu e premienan aki, Maduro a indica.
Aworaki mester ta hopi alerta pa wak kico ta e pasonan di gobierno. Tin temanan pendiente y hopi hende ta bisa cu e sindicatonan ta hopi keto of morto den e dianan aki. A bisa cu nan ta keto pasobra tin temanan cu no ta bale la pena, pero tin e 'prestatie management' cu ni cuanto e sindicatonan a critica cu puntonan valido, e asunto aki a wordo pasa toch, a expresa.
Nan sa cu tin hopi dienst di gobierno cu no ta aplicando e 'prestatie management'. Tambe tin e tema di indexering cu ta otro topico cu ta trahando riba dje tra'i cortina, pero cu no por warda 2024 yega y na final di 2024 ta cuminsa toca e tema aki pa evita cu gobierno gara nan fuera di base, e sindicalista a manifesta.
Tra'i cortina ta discutiendo riba esakinan y ta spera cu despues di e periodo di recess lo bay busca un reunion cu gobierno pa toca e tema aki y tambe e tema di indexering cu ta topiconan cu ta regarda e ambtenaarnan y pa haya un bista riba kico ta pasando cu e prestatie management y si tin cambio of no, a agrega.
