Aruba como pais di turismo mester realisa e amenasa presente
- 7.6 Mil litro di awa pa produci un par di jeans ta realidad
- Ley Hulandes pa recicla paña ta resulta e berdad pa sobrebibi
ORANJESTAD (AAN)- Na momento cu Hulanda a anuncia cu entrante Prome di Juli un cantidad di medida pa proteha naturalesa ta wordo introduci, nos a haci nos mes hopi pregunta.
Kico ta e daño cu mi por haci naturalesa cu compra di un cantidad di jeans, cu ta resulta den baki di sushi, si mi mester haci un caminata pa yega e baki di sushi y no depone e jean bieu den mondi?
Pa hende por haci su mes e pregunta aki trankil, e mester cende su air conditioner pa evita cu e ta muri di calor den e dianan aki.
Un realidad no solamente pa habitantenan y bishitantenan di Aruba pero di tur hende na mundo, cu ta uni den condicionnan di tempo hamas visto.
Oceano Atlantico, a bira un peliger mas grandi pa formacion di horcan, manera DIARIO a splica algun siman pasa ora atrobe un tormenta tropical a drenta Region di Caribe.
Un Oceano cu awa asina cayente cu e ta crea mas peliger pa horcan desaroya cu lo ta normal ora e fenomeno di El Niño cu ta percura pa biento contrario kibra nubianan cu ta cerca, aparentemente lo no por tin e efecto cu e lo mester tin.
Informacion alarmante ta alcansa Aruba di Europa, di Asia, di paisnan na Continente Americano, na Polo Norte, na Antartica y henter mundo.
Kico ta spera Aruba den temporada di horcan pero kico lo sigui spera Aruba hasta ora temporada di horcan pasa pa pasado?
Con e calor inmenso lo afecta turismo, cu mester haci mas y mas gasto pa asina atende cu turistanan mientras cu Cuido Medico na nivel internacional, mester atende otro problema mundial cu ta percura pa tur tipo di enfermedad?
Na momento cu Hulanda a tuma e medidanan pa proteha su medio ambiente, nos a puntra nos mes con lo bay cuminsa registra tur jeans y camisa cu hende no ta uza mas?
Con por ta posibel cu companianan ta responsabel pa e forma cu nan productonan ta resulta den baki di sushi?
Awe otro tipo di informacion ta drenta. Informacionnan tocante destinacionan turistico manera Aruba, cu ta preocupa nan mes cu e resultado di clima riba turismo cu ta uno di e fuentenan mas grandi di entrada pa hende y cu a kita hamber for di boca di hopi pober.
Cuanto placa paisnan pober mester inverti pa nan hendenan haya awa pa nan bebe? Cuanto placa paisnan pober mester inverti pasobra no tin yobida den e calor inmenso of pasobra hende ta hoga na lugarnan inunda?
Awa ta un produco cu ta bira cada rato mas importante pa hende. Awa cu mester ta limpi pa alimenta hende, pero cu mester pa produci cuminda y pa higiena di hende.
Organisacionnan internacional ta colecta placa pa atende cu paisnan cu a bira victima di secura, mientras clima ta sigui menasa poblacion mundial.
Como parti di e mundo, cu ta nenga pa atende cu e situacion di emergencia produci pa clima, nos mester a tuma nota cuanto awa mester pa produci e jeans cu nos a depone den baki di sushi.
7.6 Mil litro di awa pa produci loke ta necesario pa un par di jeans, ta e realidad cu mester pone nos duna mas atencion na nos realidad actual.
E momento a yega pa wowonan habri. Pa cuminsa duna balor na tur loke ta rondona hende, cu a perde nocion di kico ta bon pa su bienestar of no.
Hende cu ta yena nan mes cu informacionnan cu no ta berdad y ta crea mas problema pa comunidad mundial cu no por progresa manera mester ta, pasobra mester gasta placa na remedia, loke a sufri daño na man di hende.
Kico tabata e topico mundial mas importante ayera? Calor na tur parti di mundo, cu no tabata busca auxilio den inundacionnan of otro tipo di menasa di tempo.
Con po analisa algo otro, ora e fuente di bienestar di planeta Tera, ora hende, ta na peliger cu e mes kier sigui crea?
E momento pa tur hende asumi nan responsabilidad pa Planeta Tera a yega mientras nos mester prepara pa un temporada di horcan y di yobida cu por produci calor pero tambe problemanan serio cualkier momento.
Mientrastanto sector di Cuido Medico mester prepara pa situacionnan di emergencia cu temporada di calor lo trece pa personanan cu den nan vacacion ta disfruta di solo na beach. Of e persona cu no tin placa pa air conditioning pasobra e condicion di su curazon of pulmon ta exigi gastonan mas halto den temporada di calor.
Pa conclui: mundo mester di hende awe pa e por fungi awe y den futuro como cas di hende!
