Lider di SADA Edward Maduro y Bloke Sindical:
*Ademas di Gelijkbedrag y bashi premie
ORANJESTAD (AAN) – Den un conferencia di prensa, a yama den nomber di Bloke Sindical, Edward Maduro (lider di SADA) a dirigi palabra y el a bay riba e tema di indexering.
Como punto di inicio, Maduro a recorda prensa tocante un negociacion na aña 2019 entre e sindicatonan y gobierno, tocante indexering di aña 2018.
Esaki tabata den cumplimento di e acuerdo bilateral di “indexering overleg” cu a wordo firma na 2014. “Lamentablemente, nos tin cu bisa cu na 2019 nos no a logra finaliza e discusionnan rond di e tema aki, mirando cu varios reunion a tuma lugar. Na fin di October 2019, nos a haya un propuesta di parti di Gobierno, cual e sindicatonan a rechaza rotundamente, mirando cu esaki tabata un falta di respet, den nos concepto, e tempo ey”, Maduro a bisa.
El a agrega cu, lamentablemente, ora cu 2020 a habri pandemia a dal nos pais, y esaki a pone cu tur e discusionnan aki a keda on hold. “Miembronan ta puntrando nos hopi tempo riba esaki, mirando cu tabata tin un par di informacion eroneo di parti di gobierno pa sali afo di e topico di bashi premie, gelijkbedrag y indexering. Dia 2 di October, nos a haya un peticion pa Minister Presidente, pa un reunion cu caracter di urgencia, unda cu nos kier a trata e temanan menciona, pero lamentablemente, na fin di October nos a haya un contesta di prome minister unda e ta papia di un comision cual nos a bisa cu rotundamente nos no ta papia di comision ainda”, Maduro a señala.
E lider sindical ta lamenta cu e tempo ey e sindicatonan no a haya e reunion aki cu minister presidente. Djey nos a manda un contesta pa Minister Presidente y siman pasa, e sindicatonan (Bloke Sindical) a haya un invitacion pa un reunion otro siman, unda cu ta bay trata e temanan aki.
Maduro kier a informa e miembronan di SADA, y demas ambtenaar cu contrario na loke hopi ta pensa, cu e sindicatonan no ta bezig riba e topiconan aki, e ta recorda nan cu nan ta traha conforme e uitvoering di e acuerdo bilateral di 2014, den cual a palabra cu gobierno y e sindicatonan ta bay firma un acuerdo unda cu lo bay cuminza cu e tema di indexering dia 1 di Januari 2019.
Gobierno e tempo ey mester a zorg pa un comision pa traha un mecanismo di indexering unda cu lo a bay evita tur discusion riba problema cu e tema aki den futuro.
