ORANJESTAD (AAN): Cuerpo Policial Aruba conhuntamente cu Wardacosta di Caribe Hulandes lo ta controlando diadomingo 21 januari 2024 pa e actividad di Boat Fest na Nikki Beach.
E permiso duna pa e actividad ta di 11’or mainta pa 6’or atardi.
Informacion nobo ta indica cu Wardacosta su patruyanan hunto cu Maritiem Politie di Cuerpo Policial Aruba lo ta riba lama pa controla constantemente.
Hunto lo percura pa e seguridad di e evento. E organizacion di Boat Fest tambe ta responsabel pa percura pa e seguridad di e publico presente.
Tambe na cualkier momento por controla e documentonan necesario cu e doño di boto mester tin cune. Por ehempel: Vaarbewijs valido, documento di e boto cu ta stipula loke ta rekeri pa nan tin riba boto, manera entre otro: life jacket pa cada persona, coy paga candela etc.
Ta haci un peticion na publico presente pa mantene nan mes na e reglanan relaciona cu e cantidad di persona cu ta permiti riba e boto segun e documentacion ta stipula.
Ta pidi publico pa disfruta di e dia pero tene cuenta cu uzo di alcohol y tene consideracion cu hende riba lama mirando cu lo tin aglomeracion di hende y boto.
Polisnan riba tera lo pasa controla constantemente pa asina mantene e seguridad riba tera.
Ta recorda cu pa 6’or di atardi e evento lo stop i esaki ta nifica cu lo mester paga tur musica. Hefe di distrito di Oranjestad a reuni cu esnan encarga cu e evento pa asina repasa den e rekisitonan poni den e permiso.
