ORANJESTAD (AAN): Diaranson Famia Planea a lansa su campaña, ‘Ami ta Dicidi 2024’
y durante un conferencia di prensa trahador social Ghislaine Koeiman a splica cu tur aña ta wordo spera pa Famia Planea bin cu un campaña durante temporada di Carnaval y un biaha mas nan a cumpli.
Ta trata aki di un campaña di concientizacion cu ta hiba e nomber di Ami t Dicidi.
“Esaki ta e di 5 edicion di e campaña y e biaha aki e ta ‘Ami t Dicidi: The Challenge’”.
Maske cu e campaña ta wordo lanza durante di temporada di Carnaval, nos ta extende pa henter aña, segun Koeiman.
El a sigui bisa cu e campaña ta acopla na charlanan educativo y sigur interactive pa tur e scolnan interesa.
Segun e trahador social, Ami ta Dicidi ta parti di un movimento internacional cu ta carga e nomber, ‘I Decide Campaign’.
Esaki tin como meta, concientizacion y empoderacion di hoben y adulto pa tuma control di nan salud sexual y reproductive.
“Asina nan ta bon informa pa tuma decisionnan importante”.
Hopi biaha nos no ta para keto, pero nos tin decisionnan hopi importante den nos man pa tuma.
Pa algun aña caba e campaña aki ta conta cu sosten di Rygel Isabella, Randall Luidens y POV Productions, segun Koeiman.
El a sigui bisa cu Ami ta Dicidi ta un campaña di hoben pa hoben primordialmente y pesey dos hoben cantante talentoso ta bira e caranan di Ami ta Dicidi 2024, esta Jetzenia Martines y Travis Tip Toe.
Luidens, Isabella, Martines y Tip Toe entre otro tabata envolvi den e jingle y video clip di e jingle.
