Pa awe 5' or kier contesta bek --- ORANJESTAD (AAN): Un biaha mas, e sindicatonan a yama pa un rueda di prensa pa asina bolbe discuti riba e mesun topico relaciona cu e tema di e recorte di 12.6% di salario di e empleadonan publico.
Despues di a reuni cu gobierno diaranson unda a referi na e manifiesto cu nan a entrega siman pasa, unda nan ta exigi pa gobierno pone fin na e recorte aki.
Edward Maduro, di sindicato SADA y vocero di e sindicatonan a duna di conoce cu nan ta di opinion cu mirando cu FASE a termina, e posicion inicial pa locual ta trata e recorte ta pa e 12.6% wordo hinca den un fondo pa asina FASE por a existi.
Mirando cu FASE a termina, e ora nan a bisa na e mesun momento cu nan ta haya cu e 12.6% mester para per direct pasobra ya caba el a perde e motibo pakico a bin cu esey, Maduro a expresa.
Siman pasa e sindicatonan a bisa gobierno cu nan kier un contesta den un siman y a pone como deadline dia 2 di December.
E sindicatonan a haya un invitacion pa reuni cu Conseho di Minister diaranson pa haya un splicacion di locual ta trata nan puntonan di salida pa loke ta e manifiesto cu nan a entrega siman pasa.
Diaranson, Prome Minister a presenta un proposicion mirando cu ta dos cos e sindicatonan a pidi den e manifiesto. Uno tabata pa stop e recorte di 12.6% y tambe cu si algun cambio ta bin, pa bay mesa di negociacion.
Gobierno a laga sa cu nan a dicidi pa propone e sindicatonan pa bin cu un comision pa asina hunto cu expertonan wak kico ta e posibel dialogo cu lo por tin riba e tema aki di eliminacion di 12.6%.
Prome Minister Wever-Croes a indica cu ya caba tin tres experto riba e tereno di finansas disponibel pa bay den e comision y a bisa e sindicatonan presente den e reunion cu ta keda na nan pa dicidi si ta acepta e comision y den ki forma e comision aki lo mester bay funciona y cu cuanto participante, etc, mester bin den e comision, asina Maduro a indica.
A bisa e mandatario cu nan lo bay bek den nan seno pa asina delibera riba e proposicion di gobierno pa wak con por sigui cana bay cu e tema aki.
Diahuebs, e sindicatonan a manda un carta pa gobierno y ta mustra cu e sindicatonan cu a firma e carta di dia 25 di November ta riba un mesun linea y a mustra gobierno kico ta nan standpunt pa locual ta e proposicion cu a bin dilanti diaranson.
Pa locual ta trata e comision, nan a bisa gobierno cu toch nan ta contento cu a bin cu e parti aki, aunke esaki ta un aña laat. Pero si nan a bisa cu e retencion di 12.6% mester stop per direct, per 1 December 2021. Mescos cu e 50% di e bonus di fin di aña cu ta wordo reteni di e pensionadonan. A menciona tambe e caso di e companianan estatal y fundacionnan.
Esey ta un di e prome condicionnan cu e sindicatonan a pone riba papel pa gobierno. Tambe a bisa gobierno cu nan ta bay di acuerdo cu e comision, pero e comision aki lo mester consisti solamente di sindicatonan cu tabata parti di e manifiesto di 25 di November ultimo, asina Edward Maduro a duna di conoce.
E sindicatonan kier haya un contesta di gobierno riba e carta aki, awe mes, 3 di December prome cu 5' or di atardi, mirando cu awe tin Conseho di Minister. Di e forma ki lo por defini den ki forma lo sigui bay dilanti, Maduro a finalisa bisando.
