ORANJESTAD (AAN) – Parlamentario Setty Christiaans-Yarzagaray, den conferencia di prensa di fraccion di MEP, como di dos tema di agenda, a referi na un Comision combina, cu lo wordo forma den Parlamento.
El a splica cu e Comision Fiho di SDG’s, cu e mes ta presidi, conhuntamente cu e Comision Fiho di Economia, presidi pa Parlamentario Raymond Kamperveen, di fraccion di RAIZ, ta bay forma un comision combina, na unda Oficina Central di Estadistica (CBS) ta bay duna un presentacion di e resultadonan di Censo 2020.
E parlamentario a felicita y gradici e personal di Censo pa nan trabao di adkiri informacion riba caya, y e sa, mirando cu e ta bin d CBS unda el a traha hopi tempo, kico e trabao aki ta.
“Mi kier a felicita nan di curazon pa termina den temporadanan hopi dificil di Covid-19, y logra conclui e proyecto di Censo 2020 y produci informacion” e parlamentario a señala.
El a agrega cu siman pasa, na momento cu Gabinete Wever-Croes 2, na momento cu a presenta su programa di gobernacion, por a scucha diferente di nan acentua e importancia cu informacion tin pa e maneho di pais Aruba. “Mi sa cu rond mundo tur hende ta papia di decisionnan tuma basa riba data ‘Data Base’, ‘Evidence Base’, ‘Policy Making’ y esey ta berdad. Ban para keto cu gobernacion su direccion, hopi biaha ta basa riba data, y pesey mi ta aplaudi y ta gradici e Instituto CBS, pa tur locual nan a haci y nos ta wardando pa e resultado di Censo”, Yarzagaray a expresa.
El a agrega riba CBS su facebook, ya caba por wak con nan ta acentua ken ta muchanan di awendia, cuanto muchanan nan a conta. “Nan a conta over 22.000 mucha den Censo 2020. Nan ta indica tambe con e composicion familiar ta, desde di un periodo di diez aña pasa te cu aworaki. Nos por compara, mirando cu Aruba ya tin como cuater Censo tras di lomba, anto bo por compara con composicion familiar ta cambia, con e composicion di comunidad ta cambia, anto tur esaki ta yuda bo dirigi un pais. Pues data ta importante!”, e dama Parlamentario a acentua. Parlamentario Setty Christiaans-Yarzagaray a compromete cu pueblo cu e lo encarga pa informa comunidad tocante e resultadonan di Censo, den tur e diferente areanan, posiblemente for di Januari proximo.
