ORANJESTAD (AAN): Durante un conferencia di prensa Diahuebs mainta, Minister di Husticia y Asuntonan Social Sr. Rocco Tjon hunto cu Minister di Salud Publico y Turismo Sr. Dangui Oduber
a papia riba un cooperacion cu a logra cera entre Aruba Ports Authority (AAA) y Brandweer Aruba, pa asina yega na un acuerdo caminda Brandweer Aruba por haci peticion na Triple-A pa haya financiamento pa necesidadnan cu nan tin.
Tjon Diahuebs mainta a indica cu e ta hopi contento di por haci e anuncio aki, despues di a tene varios reunion cu sindicato y equipo di maneho, reunionnan cu tabata andando caba for di tempo cu e tabata den Parlamento.
“Algun siman atras a tene anochinan informativo pa tur personal caminda a splica e proceso di e acuerdo nobo aki. A base di e acuerdo cu pais Aruba a sera cu AAA na aña 2014, ta stipula cu brandweer lo por haci su peticionnan pa loke ta inversionnan capitalista na AAA y AAA lo por pre-financia esakinan”, segun Tjon.
El a sigui bisa tambe cu Aruba su economia ta depende grandemente di Turismo, pues mirando e importancia cu Brandweer tin pa pais Aruba, e ta hopi importante pa Brandweer ta bon ekipa pa nan por brinda e servicio necesario, no solamente na Aeropuerto pero tambe na tur nos hotelnan.
“Di otro banda, e ta yena nos cu alegria di por comparti e anuncio aki, pasobra cu e acuerdo aki nos ta bay garantiza tambe e siguridad di tur esnan cu ta traha na Brandweer”. A base di esaki a tene reunionnan cu AAA, caminda a deduci cu e fondonan ta disponibel. Na e momentonan aki, a base di e comision di trabao existente pa instala entre e Ministerio di Husticia, entre equipo di maneho y sindicato, lo nos ta en espera di tur e ofertanan pa asina de inmediato adkiri tur material necesario, segun e minister.
Ta trata entre otro di equiponan di proteccion personal, “blusbakken” , aparato pa respiracion, diferente auto cu ta necesario, “crash standers” , “tankwagens” etc.
Anteriormente e pensamento tabata cu quizas lo mester reparti e adkisicion di tur e materialnan aki den un periodo di algun di aña. Sinembargo a base di e construccion nobo aki lo por adkiri tur cos de inmediatamente.
“Un otro punto hopi importante ta e “meerjaren beleidsplan” pa loke ta e parti di “bedrijfsvoering” , mirando cu esaki ta pa e inversion capitalista, pues pa loke ta e costonan operacional, esakinan lo bay ancra den e demas añanan pa asina for di e presupuesto por percura tambe cu tur e materialnan aki cu ta bay wordo adkiri por wordo manteni tambe”, segun Tjon.
E mandatario a duna un danki grandi, muy en particular na tur esnan cu ta traha na Brandweer pa e pasenshi cu nan tabata tin como tambe e profesionalismo cu a
wordo demostra pa asina por haci esaki un realidad.
El a gradici tambe Minister Oduber pa e cooperacion di su Ministerio.
Minister Oduber di otro banda a bisa cu esaki ta un bon ehempel con e diferente ministerionan di e gabinete por traha na un manera mas estrecho cu otro, de cuadro di cooperacion.
El a splica cu for di basta tempo caba e tabata papia cu Triple-A, riba con nan por yuda financia brandweer pa nan equipa nan mes cu materialnan cu nan tin mester di dje pa nan seguridad y seguridad di comunidad en general.
