Edward Maduro di SADA
ORANJESTAD (AAN) – Segun Presidente di Sindicato di Aduana SADA, señor Edward Maduro, e sindicato semper a conta cu sosten y apoyo di su miembronan. Apesar cu esaki no semper ta keda refleha den asistencia na reunionnan, e apoyo ta bira evidente den e reaccionnan y feedback cu directiva ta ricibi di parti di e miembronan.
Sindicato SADA actualmente ta conta cu aproximadamente 150 miembro y cu mas di 40 aña di existencia. Durante tur e añanan aki, e sindicato a demostra cu e ta un organizacion fuerte, no solamente den palabra pero tambe den hecho. A lo largo di su historia, SADA a logra diferente resultado positivo cu semper a tene como meta principal defende y para firme pa e derechonan di su miembronan.
Den e situacion cu ta existi desde aña 2017, e miembronan di SADA a sigui mustra nan sosten na e directiva. Nan ta para hunto cu e directiva pa logra cambionan y mehoracionnan tanto den nan departamento como tambe den e maneho general di Cuerpo di Aduana.
Señor Maduro a subraya cu recientemente, durante reunionnan cu miembronan, e mayoria di nan a aproba y expresa nan sosten na e sindicato pa tuma accion y sigui cu diferente paso necesario pa defende nan interesnan. Entre e opcionnan considera ta inclui e posibilidad pa presenta kehonan na instancianan internacional, manera por ehempel na International Labour Organization (ILO).
Segun Maduro, e decision pa considera un paso asina ta refleha e seriedad di e preocupacionnan existente entre e trahadonan di Aduana y e determinacion di e sindicato pa sigui utilisa tur medio legal disponibel pa defende nan directiva y miembronan.
E forsa di SADA semper a bini for di su base, e union y compromiso di su miembronan y mientras cu e miembronan sigui para hunto cu nan sindicato, SADA lo sigui traha cu determinacion pa proteha nan derechonan y tambe proteha cada miembro di directiva pa logra e cambionan necesario pa un miho ambiente di trabao pa e Cuerpo di Aduana y su personal.
