Mocion di fraccion AVP riba Ley di Pensioen General pa sector priva ta impulsa gobierno pa accion

Parlamentario di AVP, John Hart:

ORANJESTAD (AAN): Parlamentario di AVP, John Hart, a indica cu e mocion presenta recientemente den Parlamento pa fraccion AVP riba e Ley di Pensioen General (LAP) pa sector priva a resulta den un paso importante pa fortalece supervision y cumplimento di e ley.

Actualmente tin aproxidamente 38.000 empleado na Aruba cu ta sigura bou di e Ley di Pensioen General (LAP), cu a introduci na aña 2011. Durante e prome Dialogo Social, gobierno AVP FUTURO a confirma cu e ley aki tin nan atencion y cu ta den un proceso di revision.

Segun Hart, e introduccion di e ley tabata cu e meta pa sigura cu doño di trabao y empleado ta contribui na un fondo di pensioen pa cu e empleado por tin siguridad financiero ora cu e yega su edad di pensioen. Sinembargo, segun e parlamentario, durante e ultimo ocho añanan e tema di supervision riba e ley no a ricibi e prioridad necesario.

“Si e ley tabatin e prioridad necesario, lo tabatin un instancia establece pa supervisa y controla e cumplimento di e ley aki. Desde 2017, Sociaal Economische Raad (SER) a señala na Gabinete Wever-Croes I cu no tabatin ningun entidad cu tabata controla riba e aplicacion di e Ley di Pensioen General,” Hart a splica.

E mocion presenta dor di fraccion AVP tabata precisamente pa urgi gobierno pa nombra un toezichthouder (supervisor) pa e ley. Segun Hart, supervision ta fundamental pa garantisa cu ta cumpli cu e ley corectamente.

“Mi ta di opinion cu pa logra un mercado laboral balansa, ta esencial cu empleadonan tin e siguridad cu nan derecho riba pensioen ta wordo respeta. P’esey ta importante cu tin un entidad cu ta controla e ley,” Hart a declara.

Gobierno a informa entretanto cu SVB lo tuma e rol di toezichthouder pa e Ley di Pensioen General. Hart a expresa su satisfaccion cu gobierno a duna oido na e mocion presenta dor di fraccion AVP.

“Mi ta sumamente contento cu gobierno a tuma e paso aki. E trahado cu ta lanta mainta pa bay trabou, cu ta traha ocho ora of mas pa dia, mester por tin e siguridad – basa riba e ley – cu ora cu e yega su edad di pensioen, cu e lo ricibi e pensioen cu e tin derecho riba dje,” Hart a enfatisa.

Di parti di fraccion AVP den Parlamento di Aruba, Hart ta insisti cu a yega e momento pa pone enfoke riba solucion di problemanan structural cu ta afecta nos mercado laboral. Segun e parlamentario, esaki ta esencial pa proteha interes di nos trahadonan y alabes reforsa confianza den nos sistema gubernamental.