ORANJESTAD (AAN): Otro siman Diahuebs, e facultad di Hospitality and Tourism Management Studies (FHTMS) di Universidad di Aruba, lo tene un Anochi di Informacion encuanto nan programa pa educacion di Master’s.
Sue-Ann Lee, kende ta Dean di Facultad FHTMS a confirma esey den un entrevista cu DIARIO. El a splica cu e anochi aki lo ta Diahuebs 28 di April 2022, for di 6:30 pm te cu 8:00 pm, na Universidad di Aruba mes.
Lo duna informacion di MBA di FHTMS, tambe MSc SISSTEM, tambe di MA Law, y di MA Governance & Leadership.
E facultad aki tin dos programa, esta uno di Bachelor’s y tambe awor presentando e programa di MBA. Diahuebs lo tin e anochi di Open House cu informacion di e MBA, cu ta Master’s in Business Administration.
E idea ta pa invita tur hende interesa di continua nan Master’s, y den e mesun invitacion aki e ta bay pa esnan trahando den diferente sector cu kier sigui cu e desaroyo di nan carera.
Pa e estudio di MBA, bo mester tin un Bachelor’s Degree y bo mester tin por lo menos dos aña di experiencia, riba un nivel di Supervisor of Management. Esey ta importante! Pues no ta djis un Bachelor’s Degree cu a caba di sali di Universidad, pero e parti di experiencia tambe ta importante, hunto cu e motivation letter.
Esaki ta e di siete edicion di estudio di MBA na Universidad di Aruba. Dean Sue-Ann Lee a splica cu di 2008 caba Universidad a yega di cuminza cu esaki, y cada 2 aña tin un MBA Program nobo cu ta cuminza.
Loke nan a nota ta cu tin hopi interes den e MBA Program aki, y den ultimo añanan a ricibi como 80 aplicacion, y esaki ta bay via un proceso di seleccion, y tur rekesito tin di wordo cumpli cune, y na final ta pasa cu un entrevista tambe cu cada studiante, pa asina un comision evalua e interes y splica nan kico e programa ta prome cu nan dicidi na join esaki.
