No tin riesgo di welga mas na AAA NV:
- Pa e empleadonan cu ta traha warda
ORANJESTAD (AAN) Presidente di Sindicato di Trahadornan di Aruba (STA), señor Diego de Cuba, a reuni Diabierna cu e Director Ehecutivo Interino di Triple-A, señor James Fazio, entre otro, y e tabata un bon reunion.
De Cuba a declara cu e ta contento James Fazio t’ey pa yuda den aeropuerto, pasobra e ta homber operacional. Asina de Cuba a bisa y indica cu ora cu e empleadonan ta comunica cu ne, door cu mayoria di nan a traha den operacion, e ta compronde nan lenguahe, y esey ta e caso di e encuentro cu Fazio, Diabierna.
“Un di e puntonan principal cu nos a bin riba mesa cu ne, ta e cambionan di warda, bao di personal cu Recurso Humano di Aeropuerto kier a limit’e na tres cambio. Nos a bis’e cu esey no por pasobra como trahado di warda, bo mester por tin espacio pa bo bida priva, pa bo bida social. Anto, e ora ey cu nos a trece tur nos argumentonan dilanti, James a bisa cu e no ta wak problema den esaki, contal cu e warda ta cubri. E ora ey el a dicidi cu e lo cambia e asunto aki y cu e trahadornan cu ta traha warda por haci cambio di warda ilimita. El a bisa cu e ta bay hacie pa un periodo di un luna, y si e funciona e ta mantene asina”, Diego de Cuba a bisa.
De Cuba a expresa cu asina mester ta; pasobra bo no por tin presion riba bo cu awo si mi por haci un cambio di warda cu otro colega y despues no.
“E mester ta ilimita pasobra bo no sa ki ora e ta presenta riba bo e necesidad pa bo cambia e warda. Anto esey ta un logro grandi di Sindicato STA, awe mainta tambe, ex-coleganan di mi a keda masha contento mes, cu un cambio di warda ilimita pa e trahadornan cu ta traha warda”, De Cuba a reitera.
Diego de Cuba a señala cu nan a sinti si, cu e Hefe di Recursonan Humano no tabata mucho contento cu decision di señor Fazio, pero e ta kere cu Jurgen Benschop si a compronde e situacion y kico Fazio a interpreta.
De Cuba a reitera cu Fazio ta un homber di operacional, kiermen un persona cu conoce un aeropuerto door en door y cu a cuminza for di abao bin ariba, y esey ta un bentaha tambe, pa tin un persona asina aki na cabes di un compania manera AAA NV.
Despues di esey a bin un discusion tocante e bon di cuminda, cu tin ora bo ta traha dos overtime riba un dia, pero nan ta duna bo un bon so. De Cuba a bisa cu esaki tambe a wordo soluciona y esaki ta un plus pa e trahadornan. Kiermen dos logro grandi a alcansa.
