Ordo di detencion contra muhe kende antes tabata Vice Consul Dominicano na Aruba

Polis Dominicano ta pidi captura di dos hende di fam Croes

ORANJESTAD (AAN): Riba Diahuebs anochi, Polis Nacional di Republica Dominicana via nan Direccion Central di Investigacion (DICRIM) a emiti un alerta di buskeda y ordo di detencion di dos persona cu nan ta considera peligroso na e pais di merengue.

   A bin resulta cu tur dos persona ta di fam Croes.  Ordo di aresto a wordo emiti contra Raúl Ernesto Guzmán Croes di 36 aña.  Tambe ta wordo busca Leony Esmeralda Croes di 58 aña.  Su cara por ta mustra conoci na Aruba, como cu Leony Croes awor ta ex-Vice Consul di Republica Dominicana kende tabata staciona na Aruba for di 2011.  El a wordo nombra via Decreto 196-11 di Gobierno Dominicano, pero aworaki mes e ta scondi y hende no sa di su paradero.

   Tanto Raúl Ernesto Guzmán Croes y tambe Leony Esmeralda Croes, ta wordo acusa di asociacion criminal, delitonan di tecnologia, y labamento di placa na Republica Dominicana.  Nan ta wordo nombra como acusado den casonan na Texas (Merca) den supuesto caso di pirateria di señal digital di tanto Dish Network LLC y e compania NagraStar LLC na 2017.

   Autoridadnan Dominicano ta adverti cu Raúl Ernesto Guzman Croes ta fuertemente arma, y ta wordo sospecha di violacionnan di derechonan di autor, delitonan di tecnologia halto, y ley contra labamento di placa.

   Si check e acusacion di 2017, tanto Leony y Raúl a aparece como e parti di demanda for di Dish Network den US Court di Southern District na Texas na 2017.

   Riba Leony Esmeralda Croes di 58 aña tin un ordo di aresto valido number 0074-septiembre 2025.  E tin casi mesun acusacion di Raúl tambe, pero pa Leony tin sospecho extra cu e lo ta financia terorisimo tambe.  Polis ta bisa cu nan captura lo yuda den controla crimen organiza, specialmente esnan cu ta dedica di comete delitonan digital.

   Polis na Republica Dominicana ta pidi poblacion pa duna tip pa yuda localiza e dos personanan aki.  Nan tin hasta e telefon (809) 682-2151 poni cu extension 19906 pa ricibi tip.

   DIARIO a tuma nota cu na Republica Dominicana riba Diabierna mes, ta hopi hende ta bisando cu si acaso Leony tabatin antecedente criminal na Merca, ta con ta posibel cu el a wordo nombra Vice-Consul na Aruba.  Acaso Gobierno Dominicano no ta haci background checks pa laga un persona ocupa un puesto oficial asina.

   Polis no a informa kico Raúl ta di Leony, si acaso ta su yiu homber of ta ruman homber.