Prome Minister Mike Eman a reuni cu ex-Prome Minister Hulandes Jan Peter Balkenende

ORANJESTAD (AAN): Durante su bishita oficial na Hulanda, Prome Minister mr. Mike Eman, a bishita ex-Prome Minister Hulandes mr. Jan Peter Balkenende.

   Ambos tin un relacion di trabao y amistad extenso cu otro mirando cu e partido CDA cual Balkenende tabata lidera, ta e partido ruman di partido AVP y durante Balkenende su periodo activo den politca, a traha hopi bon cu Eman.

   Balkenende ta contento cu Prome Minister Eman ta na Hulanda pa dialoga cu politiconan Hulandes y comparti e vision y maneho di Gabinete AVP-Futuro. Balkenende y Eman ta comparti un vision similar riba e tema di sostenibilidad.

   Balkenende tin simpatia pa e plan financiero di Gabinete AVP-Futuro y e fondo di inversion pero tambe cu e maneho structural pa mehora good governance na Aruba. Ademas Balkenende ta aplaudi cu Prome Minister Eman ta trahando cu miras pa futuro.

   Segun e ex Prome Minister Hulandes, semper el a para pa relacionnan constructivo entre e partnernan den Reino. E proceso di 10-10-10 ta nifica cu mester traha hunto y duna contenido nobo na e relacionnan den Reino. Esaki ta algo dinamico cu ta rekeri esfuersonan continuo pa yega na e miho cooperacion den Reino. Mester scohe pa un agenda conhunto unda por y mester tin respet pa otro.

   Balkenende ta impresiona cu e idea di Fondo di Inversion y ta mira e importancia pa comparti e idea aki cerca politiconan Hulandes. Balkenende tin speranza pero ta importante pa sa unda cada partner ta para, kico por mehora y kico por cambia, wak otro den cara y traha riba perspectiva comun.