Sindicato feliz cu e CAO nobo firma pa empleadonan di NV Elmar

ORANJESTAD (AAN): Riba Diabierna mainta, gerencia di NV Elmar y Sindicato STA a firma e CAO nobo cu ta drenta na vigor cu forza retroactivo na e compania di electricidad.

   Sindicato STA a indica cu e ta bay keda marca como un di e CAO historico, como cu a pasa den masha hopi dolor di cabes tabatin cune, pero mester a drecha e situacion pa loke ta e CAO aki.  Nan ta contento cu el a sali como un ‘win-win situation’ pa e compania y pa e trahadornan tambe.

   Manera ta conoci, cu e CAO nobo aki a introduci un structura salarial nobo na NV Elmar, y a bay pa un Fondo di Pensioen mas stabil cu ta APFA.  E CAO nobo a pone empleadonan conoce progreso riba tur tereno, incluyendo dianan di vacacion, beneficio secundario, placa di yiu.  Y ta bin algo nobo tambe, cu ta e Fondo di Spaar cu ta algo super positivo.  STA a bringa esaki pa varios compania y a logr’e tambe.

   STA ta contento cu a yega na finalizacion di e CAO aki, y ta gradici e team negociacion di NV Elmar, gradici gerencia, e shopstewardnan cu a duna sosten.

   E CAO nobo ta valido pa 4 aña, y a start cu forza retroactivo di 1 Januari 2023.