Trabao grandi pa un luna largo
ORANJESTAD (AAN): Un trabao grandi di mantenimento lo bay tuma lugar riba e brug riba Spaans Lagoen. Esey ta loke Director di DOW, Marlon Croes a trece dilanti durante un conferencia di prensa. Tabata presente tambe representantenan di e contratista CIC NV.
Aña pasa caba e prome fase a wordo haci, y e tempo ey a desvia trafico via e caminda principal bieu cu ta pasa mas pazuid, banda di Telearuba. Aña pasa e contratista a dedica atencion na e top di e Freddis Refunjol Brug.
Pero e aña aki como cu vakantie ta cuminza, nan lo dedica tempo na e parti abao, esta e pianan di e brug, y e kabelnan di sosten pa asina combati corosion y tambe verf esaki bek di nobo. E trabao di mantenimentonan aki lo ta cada 5 pa 6 aña, pa asina alarga bida di e brug.
Trabaonan lo ta for di Dialuna 10 di Juli, y ta sigui te Diabierna 11 di Augustus. Pa asina ora scol habri, trafico por core normal bek riba e ruta. E trabao lo socede den 2 fase.
Prome fase lo ta ora nan ta dedica na e pia di brug banda panort. Esey nifica cu trafico di San Nicolas pa Playa, lo wordo desvia riba Green Corridor mes y pasa den e via banda pazuid. Na dos lugar a habri un “pasada” meymey di e vianan di Green Corridor, special pa esaki. Segun Croes, hasta trucknan grandi (e.o. di FEMSA) por pasa via e pasadanan special cu a wordo habri.
Alivio pa Rush Hour: E team di DOW y Contratista a reuni cu Polis, Ambulans, Arubus, y demas servicio di emergencia pa cu e desvionan aki. Rush hour ta mainta entre 7:00 am te cu 9:00 am, y den deal cu Cuerpo Policial, a dicidi cu tur mainta e 4 vianan lo keda habri. Pa 9:00 am lo cera caminda bek, y lo keda asina te cu 7:00 am di siguiente mainta. Pues hasta den vakantie, lo bay coopera cu e rush hour di mainta.
Marlon Croes a splica cu nan lo vigila e movimento di trafico atardi tambe, pasobra si resulta cu e trafico ta pega, nan lo bay busca forma pa introduci alivio pa trafico di atardi tambe.
Entrante dialuna 10 juli 2023 cuminsando 9’or di mainta te 7’or di mainta e siguiente dia lo cera e via (‘lane’) direccion di San Nicolas pa Oranjestad riba Freddis Refunjol Brug di Green Corridor pa haci trabaonan di mantenimento.
Desviacion di trafico lo bira riba e caminda, direccion di Oranjestad pa San Nicolaas.
Despues di 2 siman lo haci e cambio, cu lo cera e via direccion Oranjestad pa San Nicolaas y e desviacion lo bira riba e caminda di San Nicolas direccion Oranjestad. Automobilistanan ta ser pidi pa por fabor tene cuenta cu e cambionan aki.
