Simposio 'Stop Abuso Contra Adulto Mayor' ta trece mas concientizacion riba problematica di abuso contra Adultonan Mayor

Damara Rasmijn, di Directie Ouderenzaken

ORANJESTAD (AAN): Damara Rasmijn, relacionista publico di Directie Ouderenzaken a splica den un entrevista cu DIARIO, cu 27 di juni nan a organiza un simposio yama 'Stop Abuso Contra Adulto Mayor'. Dia 15 di juni pasa tabata Dia Internacional Contra Abuso di Adulto Mayor, y como Directie Ouderenzaken, nan kier trece concientizacion riba parti di Adulto Mayor, e diferente tipo di abuso cu un adulto mayor por experencia.

E simposio lo tuma lugar dia 27 di juni na Gloria Aruba, di 8:30 di mainta te cu 1'or di merdia. Diferente orador lo ta presente pa papia riba e abusonan contra adultonan mayor, manera señora Antoniette Geerman, cu ta un psicologo y Janine Rodriguez di Buro Slachtofferhulp.

Abuso contra Adulto Mayor sa tuma lugar den diferente forma, manera abuso financiero, emocional y psicologico, negligencia y abuso fisico.

Señora Rasmijn a indica cu e simposio ta habri pa tanto adultonan mayor mes, nan yiunan y famia, como tambe pa profesionalnan den e ramo.