ORANJESTAD (AAN) – Sharline Koolman, Hefe di Departamento di Malesanan Contagioso (DBZ), na Departamento di Salud Publico (DVG), ken ta lidera Crisis Team, a hiba palabra den conferencia di prensa extraordinario, Diasabra cu a pasa.
Sharine Koolman a cuminza bisando cu den e ocasion aki e ta papia den otro tono, pasobra e ta haya increible cu mester a bolbe para den sala di prensa, pa motibo di e pandemia.
El a comenta cu di parti di e cluster medico nan ta considera e situacion aki increible, y cu DVG ta pidiendo data tur dia di tur sorto di cos, Sharline Koolman a comenta.
“Nos di afdeling epidemiology, ta produci data constantemente, y ora bo ta pidi data ta pa haci algo cune. Data n ta pa pone den un lesenaar anto bo sa cuanto hende tin of laga di tin. Data tin cu wordo transforma den un maneho y e maneho ey tin cu wordo ehecuta. E maneho ta wordo traha y Crisis Team ta acorde y ta mande pa pueblo, pa nos sa kico ta going on, y kico nos ta bay haci cu e data, pero ta parce cu nos no ta haci caso na e data. Pero tur dia, nos ta keda haya peticion pa data ”, Sharline Koolman a expresa reiterando cu mester haci algo cu data sino e no tin ningun balor agrega, pesey e ta pidi por fabor pa ora ta pidi data como pueblo, ban haci algo cune tambe.
Koolman a señala cu loke ta pasando cu Hospital ta algo cu Crisis Team a premira. “Nos a bisa cu si nos keda cu e actitud aki nos ta mira esaki transforma bek pa hospital y esey ta sosode. Nos sa cu despues di un pa dos siman cu e casonan ta subi, e por traslada den casonan cu ta wordo interna grave, y esey ta sosodiendo.
“Nos a mire pasa den otro paisnan, y na Aruba no ta diferente. Tin biaha ta wordo reclama cu ora nos ta publica data, cu tabata tin un hende mas of un hende menos interna of un hende mas, un hende menos cu a fayece. Kico esey ta nifica? Mi ta kere cu pueblo, ora ta mira un caso mas of un caso di menos, cu nos mester coregi esaki den un dia e no mester ta nada dramatico. E ta dramatico si, pa un hospital cu si e tin 12 cama di ICU, y e tin diez pacient interna, un caso mas of un caso menos ta dramatico pa nan. Ami tambe a traha den Cuido Intensivo hopi aña pasa; mi sa mas of menos con cos ta bay” Sharline Kolman a señala.
El a agrega cu pa esnan den ICU, Servicio di Emergencia, pa e docternan di cas, cu tambe a cuminza bisa Crisis Team, siman cu a pasa, cu nan horarionan di anochi ta hopi mas pisa pa nan. Nan ta haya den un anochi 40 yamada, pues nan tambe a bisa nos cu e situacion aki ta bay escala.
“A base di esey, nos a papia di esey siman pasa caba, den un conferencia di prensa, y a bolbe pidi wak nos ta atende cu fiestanan y e bida nocturno cu nos tin. Nos no a duna nada di oido na esey, y aworaki nos ta mira locual ta pasando na Hospital; y tin algun hende lo spanta, pero esaki ta simplemente nos comportacion cu ta resulta den esey”, Sharline Koolman a subraya.
El a agrega cu e ta referi tambe na ambulance y na Departamento di Salud Publico. Pa Salud Publico esaki ta tambe un subida drastico di casonan.
Koolman a menciona cu nan tin cu yama hopi hende den un dia, entre otro pa controla si nan tin cu bay isola, esnan no vacuna cu ta den cuarentena, y esnan cu mester conforma cu ta vacuna pa saca nan di cuarentena, pero constantemente nan ta wordo critica si den e data tin un mas of un menos.
