ORANJESTAD (AAN): Ademas di e presion cu e pashentnan di Covid-19, na Hospital tambe a ripara cu e cantidad di pashentnan cu ta drenta na departamento di urgencia pa otro motibonan a aumenta.
E motibo di esaki ta pa uso y abuso di alcohol, asina Prome Minister Evelyn Wever-Croes a indica.
Tin hende cu a kere cu Aruba ta for di e crisis di Covid-19 y ta bebe bay off, pero esaki ta pone otro presion na Hospital tambe cu aworaki no tin espacio p'e, a remarca.
Di diahuebs pa diadomingo, por ehempel, mas di 100 pashent ta yega Spoedeisende Hulp. Imagina si un persona ta yega cu un atake di curason y tin algun hende cu pa motibo di buracheria ta yega e ora ey pa busca ayudo y tin e pashentnan di Covid.
E mandatario a bisa cu Aruba ta den un situacion hopi critico y aunke Hospital no a yega na e codigo preto, pero sin e aumento di personal, ta bay yega na e nivel ey den algun dia y personal no ta facil pa haya.
Ta buscando personal y no sa con lihe por soluciona e problema aki, Evelyn Wever-Croes a declara.
