ORANJESTAD (AAN)—Sharline Koolman, Hefe di Departamento di Malesa Contagioso (DBZ) na DVG, y tambe lider di Crisis Team,
den conferencia di prensa extraordinario, di Diasabra, a bisa cu e ta pidi tur hende pa pone un spiel nan dilanti y wak kico nan a haci pa evita e contagio di covid-19.
El a haci enfasis cu DVG ta wordo hopi critica pa medionan social, Diasabra tambe nan a wordo critica pero: “it’s ok” el a expresa.
Koolman a encurasha e parti di nos comunidad cu no a vacuna ainda, pa bay vacuna. El a bisa cu tin un grupo di persona cu a mustra boluntad pa laga nan famia, pa bin yuda, pero no por ta asina cu nan lo mester a sinta warda den un ballroom di Ritz Carton, y reza pa hendenan yega tuma e vacuna.
El a bisa cu nan a organiza e vacunathon 3.0 aki pasobra hopi hende a pidi pe, y a puntra pa tur esnan cu kier a coopera pa haci esaki un biaha mas. Y a pidi encarecidamente e personanan cu no a vacuna pa por fabor cumpli cu e pais, pasobra e medidanan cu mester a tuma Diabierna anochi laat no tabata facil tampoco, pasobra tur hende sa e impacto cu nan ta bay tin riba henter e pais aki y e ta kere cu ainda no tur hende ta conciente di esey.
Sharline Koolman a pidi e hobennan di 12 aña bay ariba cu mescos cu nan cumpra nan keds, nan agenda, nan tas y demas material di scol, pa cuminza aña escolar, pa inclui e vacuna den dje.
El a reitera si, cu hecho di a vacuna den e vacunathon aki, no ta nifica cu nan ta proteha. Pero mester warda cinco siman pa e vacuna haci su trabao.
El reitera un biaha mas cu no kiermen cu dialuna mainta tur hende ta inmuniza. Nos comportacion ta bay conta pa e siguiente simannan. Koolman a señala cu e prome plamamento cu a surgi na Aruba, tabata debi na “spula krijt”.
Koolman a bisa cu pa fin di September ainda por keda haya casonan, tanten cu e persona no ta completamente vacuna lo mester sigui proteha su mes. No kiermen cu hende cu e vacunanan completo no por haya covid (Delta). Un hende cu tin tur dos dosis pero e ta hayando tratamento di cancer, por ehemplo, su defensanan ta baha y esey kiermen cu e por haya e virus, bira malo y incluso wordo interna na Hospital, pero e chens pa e muri di esey ta mas chikito.
No ta asina cu pasobra un hende ta vacuna e por sali na caya haci tur cos, pasobra esey tampoco ta berdad. Pero e por baha e chens di pega otro persona cu ta di riesgo halto, of su mes cu kizas tin un malesa cu no sa di dje.
Koolman a expresa cu ta tristo pa mira cu tin hendenan cu ta drenta Hospital den un situacion cu nan ta fayece. Por ta pasobra e covid a afecta e persona na un manera drastico, of por ta pa un problema interno. Tin biaha e virus ta cuminza cu un simple coremento di nanishi, un tiki tosamento, y di un ora pa otro, e ta escala. E ta aconseha cu ora esaki sosode, si ta den dia acerca bo docter di cas, cu ta purba yuda te unda e por.
El señala cu e medidanan ta poni te 1 di September, pero un biaha mas, a bisa cu ta depende di comportacion di nos tur. Si e casonan di contagio ta baha, podise na Hospital tambe e hospitalizacionnan door di covid ta baha y paulatinamente por flexibiliza e medidanan. Tambe kier a haci comunidad conciente cu lo bin mas variante di Covid-19, y mester sigui proteha nos mes.
