Simon Waslander ta cuestiona unda Energia Solar a keda den Policy di Gobierno

Analista mustrando cu prijs di panels solar a baha

• No a tende nada mas di e plan di Ministerio di Economia 

ORANJESTAD (AAN): Despues cu el a bira un persona cu ta bati alarma riba posible bancarota den futuro di e fondo di SVb, awor e consehero y analista Simon Waslander ta cuestiona di con no a sigui empuha mas den direccion di mas adaptacion di Energia Solar pa e isla.

   E ta splica cu tarifa di coriente ta un di partinan mas cardinal den e crisis cu a impulsa e costo halto di bida na Aruba. E efecto ta di tur dos banda, pues tanto direct y indirecto. Na prome luga pensa ora un cliente ta haya un cobransa halto di Elmar, incluyendo comerciantenan local tambe. Esaki ta crea gastonan grandi pa empresa local y door di esaki companianan ta hisa prijs un biaha mas. Pues e effecto di prijs halto di coriente riba inflacion ta inmenso.

   Gobierno oficialmente a stipula cu tin un politica pa hisa e produccion di energia renobabel y baha prijs di coriente, cual ta publica riba website di DEACI cu por haya riba e siguente link:

www.bit.ly/aua-energia

  Tambe Ministerio di Economische Zaken a anuncia un plan economico general pa Aruba cu hopi fanfaria. Den e plan aki tabata tin un capitulo dedica na energia solar pa esnan di menos recurso. Te dia di awe no a tende nada mas di e plan bunita aki pa bin cu un programa di subsidio pa esnan di menos recurso instala solar panels na nan cas.

   Net awor cu prijs di Solar Panels ta na un Nivel Record abao!  Y claro cu Aruba door di su locacion den Caribe ta un di e islanan cu mas oranan di Solo na mundo, esta 9 “zonne-uren” en general pa dia.

   Siman pasa OPIS, un Dow Jones company a publica cu prijs nobo di paneel solar silicon a yega un nivel di prijs record abao, esta US$ 0.06 per watt.
  “Mi persona a worde critica cu no a duna calculacionan kico esaki kiermen pa un consumidor na Aruba,” Waslander a bisa.

   El a bisa cu e unidad usa pa panel solar ta kWp. Esta 1 kWp kiermen cu e paneel ta lo produci 1.000 kilo-watt-hour (kWh) pa aña den teoria. Den practica esaki lo ta mas abou y normalmente e produccion ta entre 750-850 kWh.
  Ban asumi pa e calculo aki 750 kWh un panel di solar mas nobo lo produci pa aña (onderschatting).  E panel solar di 1 kWp lo costa kostprijs di bulkscale inkoop US$ 60 (0.06x1000).   Usando e prijs di $60 y un produccion di 750 kWh ta US$ 0.08 pa kWh ta paga (60/750).  Finalmente esaki ta 0.144 Florin per kWh. (0.08x1.8).
   Esaki ta 60% mas abou cu tarifa di NV Elmar y usando onderschattingen grandi pa colmo.

   Pesey e ta cuestiona, si acaso ta un agenda secreto Gobierno tin cu no ta Pusha Solar pa Aruba.  E ta corda con Ministerio di Energia y demas gobernantenan orguyosamente a anuncia cu nan ta bringa pa baha prijs di coriente y na mesun momento pusha pa energia berde.  Den pasado a anuncia proyectonan Eagle LNG y Windpark.
   Cerca e Waslander, ta surgi e pregunta sumamente grandi:  Di con no ta pushando energia Solar den ningun proyecto noemenswaardig di Gobierno na Aruba?
   Cu prijs di Solar energy no ta ningun secreto riba ambos nivel internacional (publicacionnan di PV Magazine) y local.   Waslander a yega di publica over energia Solar den DIARIO y demas otro medionan, pues tin mas cu sufficiente exposure local.
   “Mi opinion ta cu Energia Solar por duna un alivio inmenso pa pueblo di Aruba y baha inflacion den manera drastico.  Mi ta asombra di con esaki no ta pasando.”