ORANJESTAD (AAN): E pida caminda for di rotonde di Santa Cruz, te na e cruzada pa bay Papilon cerca di cede di MEP, ta apenas 415 meter largo.
Pues un pida hopi chikito, sinembargo considerando e hecho cu tur dos banda di e caminda aki tin varios negoshi, y tambe un Centro Deportivo grandi, ta un sorpresa pa mira cu ningun caminda tin un zebrapad poni.
Esey ta comentario cu DIARIO a ricibi e siman aki di automobilistanan cu ta topa cu hendenan ta riesga di core cruza caya, unda cu ta. Y esey ta bin debi cu no tin zebrapad pinta abao riba caminda na lugarnan ideal.
Pa e motibo ey, automobilistanan cu ta tumando nota cu e crew di DOW, como tambe personal di contratista Odinsa (encarga cu Green Corridor), y e contratista Mota Engil (encarga cu Watty Vos Boulevard) ta marcando linea riba casi tur caminda e simannan aki, lo ta bon idea pa traha Zebrapad tambe na Santa Cruz. E lo ta un gesto cu lo ofrece mas trankilidad na e peaton, y alavez haci e chauffeur bira mas conciente.
