ORANJESTAD (AAN): Diabierna siman pasa, Sindicato di Maestronan na Aruba, Simar, a dirigi un carta pa Secretaria di Estado drs. Van Huffelen, di relacionnan di Reino Hulandes pa mustra nan decepcion di loke ta pasando na Aruba.
Aki a referi na e entrega di salario di ambtenaar- y pensionadonan cu a socede na un forma di sacrificio. Esaki a inclui e entrega (no solicita) di e salario di ambtenaar y gelijkgestelden, unda nan a kere cu ora cu situacion economico drecha, nan lo debolbe e salario bek na un nivel normal. Pensionadonan tambe dos biaha mester a nota dos biaha reduccion na 50% di nan prima di fin di aña.
Sinembargo Dialuna 4 di Juli 2022, Sindicato a keda sorprendi desagradablemente cu e informe cu Parlamento a aproba e Ley di FASE cu mayoria di voto, apesar cu ta hopi cla di comienzo cu iregularidadnan a socede den esaki.
Simar a informa Secretario di Estado Van Huffelen, cu den e rapport di Contraloria General di 28 April 2022, a confirma cu entrega di subsidio FASE a bin cu diferente deficiencia, cu e consecuencia cu no tabatin suficiente garantia cu e fondonan publico a wordo gasta na forma mas eficiente posible.
E investigacion pa cu costo y ingreso di FASE haci pa Centrale Accountantsdienst a mustra cu despues di diferente control a sali na cla cu tabatin hopi iregularidad, abuso, y uso indebido den e proceso FASE, y pesey un pago indebido di mas di 7 miyon Florin a socede. A hasta menciona cu hendenan cu a muri a cobra suma di FASE.
Simar ta bisa cu nan a tuma nota yen consternacion di e hecho cu no ta atribuyendo consecuencia na e iregularidadnan aki.
Pa colmo den Articulo 9 inciso 2 di FASE ta mustra cu tur e tramitenan cu ta reglamenta den e ley, tin di wordo declara como ‘cubri’.
Den Articulo 6 parafo 3 di e Ley di FASE ta poni cu e Ministro KIZAS por pidi esnan cu a haya placa inhustamente pa paga esaki bek.
Pesey Simar na nomber di miembronan kier a expresa nan malcontento y decepcion, ya cu nan derecho di propiedad (esta ‘salario’), ta wordo afecta gravemente. Nan ta sinti nan mes engaña pasobra awor ta parce cu un parti di e pagonan di FASE a wordo haci indebidamente y den e ley di FASE e derecho di empleadonan no ta wordo protehi, pero pa e Ministro responsable tur cos ta cubri.
Simar ta bisa Van Huffelen cu nan ta keto ay den scuridad con leu e anuncio recien cu ta bay elimina e recorte entrante 1 Juli 2022 (esta 25 luna despues di e hechonan) lo bira realidad. Pa Sindicato ta inaceptable y sigur di condena cu na un forma masha iresponsable e derecho di propiedad ta wordo cuida na Aruba. Esaki ta contra e principionan democratico y ta un señal di mal gobernacion.
E carta ta firma pa Josephine Albertus di Simar.
