Caribbean Mercantile Bank N.V. ta sostene celebracion di SPO su graduadonan

ORANJESTAD (AAN): Diasabra anochi a tuma luga e ceremonia di graduacion di klas 2021-2022 di Scol Practico Pa Ofishi (SPO) Santa Cruz.

Tabata un ceremonia yena di momentonan emocional pa tur esunnan cu ta forma parti di e storia di exito di e hobennan aki. Caribbean Mercantile Bank N.V. ta reconoce e importancia di e trabou di e ekipo di SPO Santa Cruz y p’esey cu hopi animo a financieramente sponsor e celebracion cu nan merece. Tambe e banco a duna un regalo en efectivo na cada “best geslaagde” di caba stroom.

            Studiante, mayor y docentenan a comparti e satisfaccion di a yega na fin di un trayecto cu no ta un fin, pero mas bien ta representa un stap mas dilanti den e obhetivo di surpasa obstaculonan y converti den ciudadanonan capaz y productivo di nos sociedad.

            E ceremonia di graduacion a tuma luga den Renaissance Convention Center cu tabata nechi decora na blaasnan di color, luz y musica, pero tambe complementa pa e sentimento grandi di orguyo. Y no ta pa menos, ya cu SPO Santa Cruz ta un instituto cu ta brinda educacion y guia na hobennan cu ta confronta cierto retonan sacando e maximo probecho di e poco recurso material y financiero cu ta conta cu ne.

            Esaki ta hustamente e tipo di organisacionnan cu Caribbean Mercantile Bank N.V. ta gusta di por yuda y laga resalta.

            Ta na su luga pa tur hende na Aruba sa cu nos tin profesionalnan cu vocacion pa enseñansa y cu ta sumamente dedica pa brinda nos muchanan e hermentnan necesario pa nan tambe bay ey’fo y alcansa exito den bida. Algun di e hermentnan aki ta conocemento, confiansa den nan mes, ademas di respet y empatia pa otro.

            Un total di 46 studiante a gradua di e SPO Santa Cruz despues di cumpli cu e programa di les den materianan di idioma, ciencia, pero tambe arte y agricultura. Cada un a ricibi su diploma y den proximo aña escolar ta inicia e siguiente fase di nan estudio na EPB. Director Zoraida Godoy y docentenan di SPO ta desea cada un hopi exito y pa semper keda kere den nan mes.

            Tambe SPO Santa Cruz ta sumamente gradici cu CMB pa tur e cooperacion ricibi den e realisacion di e anochi di graduacion. Cu e gesto aki a contribui, no solamente na crea un bunita recuerdo den memoria di e hobennan, pero tambe na  laga nan a sinti cu nan tambe ta forma parti di nos comunidad y tin algo di aporta na un miho pais y na un miho mañan.