Ley ta duna e posibilidad pa den un periodo di 5 aña tuma medida contra esnan cu a haci mal uzo di FASE

ORANJESTAD (AAN):  Minister Glenbert Croes a yama un conferencia di prensa diaranson mainta unda e tabata tin como agenda trata e tema di FASE.

            E mandatario a indica cu dia 4 di Juli ultimo, Parlamento di Aruba cu mayoria sosteni door di fraccion di MEP y fraccion di RAIZ, a aproba e ley di FASE.

            El a expresa su gratitud na fraccion di MEP y fraccion di RAIZ pa e sosten aki pa e fondo de asistencia social di emergencia, cu pa casi 2 aña largo tabata e instrumento pa yuda 12.246 persona den e momentonan mas dificil nunca bisto na Aruba y na mundo.

            E mandatario a lamenta cu partido AVP, partido MAS y Accion21 a vota contra. "Pero no obstante e voto contra di AVP, e voto contra di MAS, e voto contra di Accion21 contra e ley di FASE, contra e yudansa di FASE, Parlamento di Aruba c'un mayoria a acepta y aproba e ley".

            FASE a haya su base legal pa tur e yudansa duna. "Aruba a autorisa e base legal pa e fondo di asistencia social di emergencia, e 950 florin cu a wordo duna durante e momentonan di mas dificil pa tur esnan cu a bin na remarca pa haya yudansa di FASE", a bisa.

            Segun Croes, tin cu a haya menos, esey tabata depende di kico tabata nan entrada (part-timers, zzp'ers cu tambe a haya yudansa. "Aruba a yuda tur ser humano cu a bin na remarke pa yudansa di FASE".

             Awor cu e base legal di e ley aki ta duna e posibilidad pa den un periodo di 5 aña tuma medida contra esnan cu por a haci y a haci mal uzo di FASE, Glenbert Croes a splica.