*Tin hopi aspecto den enseñanza cu mester inverti pocopoco
ORANJESTAD (AAN) — Gerlien Croes, Minister di Desaroyonan den Enseñanza, den entrevista cu Matutino DIARIO a bisa cu e tabata buscando un modelo pa hisa e salarionan di docentenan, pero no tabata tin ni presupuesto ni calculacion di cuanto e ta costa Pais Aruba.
Minister Croes a indica cu na e momento aki, e no a wordo ahusta tampoco na un maneho. El a señala cu e por duna e docente un extra pero na kico e ta acople?
“E docente tambe mester por crece. Nos mester ta realistico y alavez tambe mi kier crea e espacio, los di e aspecto salarial, pa wak tambe si e por ta mas flexible pa e orarionan di duna les, pero tur e temanan aki lo bin dilanti den e lunanan venidero. Pero esey no ta kita ni pone, cu nos ta menciona e retonan pero tambe mi kier gradici docentenan, e veld di Onderwijs cu apesar di tur e obstaculonan aki, nan ta keda haci nan trabao. Nan ta keda duna mas di nan mes y ta carga nan trabao, cu ta esun di mas importante pa Pais Aruba”, Minister Gerlien Croes a reitera.
El a expresa su miho deseonan pa docente, alumno, mayornan y tur envolvi den enseñanza hopi exito pa e aña escolar aki. “Ami ta kere firmemente cu nos tin cu flexibilisa nos maneho di Onderwijs, y ta wak cu hopi cos ta sosode na e momentonan aki”, e dignatario a señala.
El a referi, entre otro, na hopi mucha cu tin problema di habla, y a bisa cu mester bay incentiva e docentenan tambe, pa ta un tiki mas flexibel ora nan ta wak mucha cu problema di tall. Mester structura e ayudo di Logopedista, pero ora di wak e lista di spera di logopedista e ta hopi largo.
“Nos mester bay pocopoco con pa inverti mas y mas”, Minister di Enseñanza, Gerlien Croes a subraya.
