Siman Mundial di Curason ta pa refleha y pa promove un cambio den estilo di bida

Pesey lo mira lusnan color cora riba algun monumento

ORANJESTAD (AAN):  Den e proximo dianan, entre 23 di september y 30 di september automobilistanan por tuma nota di lusnan color cora riba e monumento di Bestuurskantoor, na retonde dilanti di WEB y tambe na e toren di Aeropuerto Internacional Reina Beatrix.

            E lusnan cora aki ta den conexion cu e siman mundial di curason. E meta di e lusnan cora ta pa yama atencion di tur hende riba malesanan di curason cu por perhudica nos salud.

            Combati e malesanan cardiovascular sigur ta importante pa cada curason cu ta bati. Conscientisacion ta un parti hopi importante den cuadro di e plan nacional di prevencion di malesanan NCD’s.

            Un di e causanan cu mas ta afecta nos curason ta presion halto, esaki por wordo combati door di hiba un bida mas saludabel. Presion halto ta afecta mas cu 30% di adultonan rond mundo, cu ta encera mas cu 1 biyon persona. E ta e factor di riesgo principal di malesa di curason (cardiovascular, specialmente malesa coronario y stroke (atake cerebral), pero tambe malesa di riñon cronico, problema di curason, aritmia y demencia.

            Esaki ta e razon cu Minister Dangui ta urgi comunidad pa sigui haci nan testnan di presion, haci bo chekeo mediconan regularmente pa preveni cualkier tipo di malesa.

            Ministerio di Salud Publico su maneho ta basa riba prevencion. E siman aki ta pa refleha y pa promove un cambio den nos estilo di bida, pa hiba un bida mas saludabel y mas activo. Esaki por preveni malesanan cardiovascular, ataka di curason of stroke.