ORANJESTAD (AAN): Directiva di Centro di Bario Playa Pabao ta anuncia cu e aña aki un biaha mas ta organisa nan famoso y tan spera “Plan Vacacional” di luna di October.
E actividad ta tuma lugar na Centro di Bario Playa Pabao cu un duracion di un siman, cuminsando 2 di October y terminando 6 di October.
E programa ta di dialuna pa diabierna di 8’or am pa 12’or pm. Nos Plan Vacacional ta specificamente pa muchanan entre 4 y 12 aña. A riba peticion di e muchanan por dicidi pa hisa e edad pa 15 aña.
Durante e siman aki ta bay tin actividad cu lo tuma lugar na Centro mes y tambe lo bishita diferente lugar manera nos ta bay pool, deporte, obra di man y hopi actividad mas. Tambe tin informacion y instruccion di e deporte di baseball y tambe ta bay tin weganan recreativo pa tur mucha tanto paden como pafor.
Manera tur aña e ultimo dia di e Plan Vacacional lo tin un anochi di presentacion pa mayornan por gosa di show cu cada grupo ta presenta. Naturalmente por bin cambio ainda den e programa.
Mayornan por pasa inscribi nan yiu (nan) na Centro di Bario Playa Pabao di dialuna pa diabierna, mainta entre 8’or am y 12’or pm y atardi entre 2’or pm y 6’or pm. Nan Plan Vacacional tin un duracion di un siman.
Pa motibo organisatorio e ultimo dia pa inscribi ta diasabra mainta dia 30 di september te cu merdia 12’or.
