Prome anochi cu animacion di diferente artista local
ORANJESTAD (AAN): Prome Minister Mike Eman cu vision grandi pa duna San Nicolas mas bida cultural y eventonan nacional. Pa prome biaha, diferente actividad patriotico a tuma luga den Carnival Village. Entre nan tabatin e Festival Un Canto pa Aruba su Himno y Bandera, cu a tuma luga dia 6 y 7 di maart, treciendo hunto talentonan local di tur edad.
E celebracion cultural a culmina diadomingo cu un bunita Explosion Cultural, cu a inclui un variedad di presentacion di canto, baile y arte. Durante e evento tambe a presenta tur e ganadornan di e categorianan infantil, hubenil y adulto.
E actividadnan cultural aki ta mustra e vision di Prome Minister Mike Eman pa fortifica cultura y identidad di San Nicolas, pa asina e districto por sigui crece como un centro di arte urbano. Actualmente e artista Rasheed Lowe, den colaboracion cu Tito Bolívar, ta trahando riba un mural nobo riba e edificio di Chocolate City Bar & Restaurant na Bernardstraat, dedica na e gran musico Arubiano Julio Bernardo Euson.
E mural, cu ta casi completo, ya ta mustra un exprecion artistico impresionante di e herencia musical y cultural di Euson. E proyecto ta forma parti di e vision pa sigui transforma San Nicolas den un galeria di arte habri, resaltando talento y historia cultural di Aruba.
Feria Patriotico a trece comunidad hunto
E Feria Patriotico riba su prome anochi na Aruba’s Carnival & Entertainment Village na San Nicolas tabata un bunita comienso, treciendo hunto comunidad, cultura y talento local den un ambiente di orguyo nacional.
E actividad a cuminsa cu un momento solemne cu Scouting Aruba, encarga cu e acto di hisa bandera di Aruba, sigui pa presentacion di e Himno “Aruba Dushi Tera”, canta pa Stephanie Quant. E momento aki a crea un ambiente di respet y patriotismo entre tur esnan presente.
Despues di e ceremonia oficial, e publico presente a disfruta di un variedad di programanan cultural cu a inclui shownan di baile cultural, cu a pone color y tradicion riba scenario.
E ambiente festivo a sigui cu e entrada di The Rhythm Brassband, cu a anima e publico presente cu ritmo y energia, preparando e scenario pa e presentacion di e monarcanan di Aruba su Carnaval 72.
Durante e anochi, varios hoben artista di carnaval a haya oportunidad pa presenta nan musica y talento riba escenario. Entre e presentacionnan tabatin Brooke Lockhart, Reina Hubenil di Carnaval 72; Ashandric Richardson (Jammer Jr.) cu e cancion Carnaval is a Party; Stephanie Quant cu e tumba hubenil Eynan mi ta bay; Zaidyen Donker (Johnny Boy) como Johnny Boy The Instructor y Jaylon Machado cu Amor.
Tambe e publico a disfruta di presentacion di varios ganado di competencia di carnaval hubenil y infantil, entre otro Roadmarch Queen Infantil Adeliza Henriquez (Reina Fantasia), Roadmarch King Youth Brayden Elisabeth (Stinging B Junior) y Rei di Tumba Infantil Jaymerson Kelly.
Un momento special tabata e presentacion di Melody Franken, Reina di Tumba Hubenil di Carnaval 72, cu e cancion Ban Cumi, cu a haya un reaccion sumamente positivo di e publico presente.
E anochi a clausura cu un tremendo presentacion musical di Shine Music, cu a mantene e ambiente bibo te na final di e evento, haci hopi hende disfruta di musica y celebracion di cultura Arubiano.
Prome Minister Mike Eman a expresa su gran satisfaccion cu e participacion di comunidad y e energia positivo cu a reina durante e Feria Patriotico, cu a demostra un biaha mas con cultura, musica y tradicion por trece comunidad hunto.
E Feria Patriotico ta parti di e celebracion di 40 aña di Nos Status Aparte y 50 aña di Nos Himno y Bandera.
Si bo no a logra bin e prome anochi, no perde e Feria Patriotico cu ta continua awe 12 di maart. Entrada ta completamente gratis, pa asina tur hende por bin celebra e rikesa cultural di nos isla hunto.
