Audrey Croes mustrando riba Dia di Himno y Bandera:
- Lo lansa documentario di historia di Elmar
- Show di Kylie y Katya hunto cu Chispito
ORANJESTAD (AAN): NV Elmar Aruba ta sigui celebrando su 75 aniversario proveendo coriente na Aruba. Desde november di aña pasa, nan a organiza diferente actividad, entre otro, e lansamento di nan mascota Chispito, evento di Hardin di Luz, encuentro cu Sinterklaas, y bishitanan na scolnan cu Chispito.
E biaha aki, pa conmemora Dia di Himno y Bandera, diaranson 18 di maart, for di 11:00 di mainta te cu 4:00 di atardi, Elmart a organiza un evento special cu nan mascota Chispito, kende a wordo lansa pa concientisa muchanan riba siguridad cu coriente. E evento publico aki lo tuma luga na Museum of Industry na San Nicolas y ta completamente gratis.
Relacionista Publico di Elmar, señora Audrey Croes, a indica cu Elmar a mira importante pa organiza e evento na e Museum of Industry, ya cu e museo ta representa diferente industrianan di Aruba, y un di esakinan ta e industria di coriente. Den e museo tin diferente aparato historico cu ta mustra e desaroyo industrial di coriente, y durante e tour cu lo tin e dia aki, bishitantenan por wak esakinan. Adicionalmente, pa marca e ocasion, NV Elmar lo lansa un documentario cu ta conta e historia di Elmar.
Señora Croes a remarca cu e evento ta specialmente pa famia, unda muchanan por disfruta di un kids corner, weganan educativo y electrico, y hopi otro actividad. Riba e mesun dia tambe, Elmar lo lansa e jingle di Chispito, cu un show musical presenta pa Kylie y Katya. E show lo cuminsa 1:00 di merdia.
Lo ta un dia pa pasa den famia, unda no solamente por disfruta di tur e actividadnan educativo, wega y show pa muchanan, sino tambe por disfruta di cushina bon surti bou cargo di Kiwanis Club of San Nicolas.
