Siman di Conscientisacion di FAVI pa Dia Internacional di Garoti Blanco cu Strepi Cora

Señora Sary Wernet-Kelly

ORANJESTAD (AAN): Den conexion di e siman di conscientisacion relaciona cu Dia Internacional di Garoti Blanco cu Strepi Cora, FAVI ta activo riba caminda cu e meta pa trece mas informacion y conscientisacion den nos comunidad.

   Señora Sary Wernet-Kelly, Terapista di Revalidacion na FAVI, a remarca cu e uzo di e garoti ta sigui crece, loke ta mustra cu e informacion cu FAVI ta duna ta yega na pueblo, y cu mas hende cu dificultad visual ta bira cliente di FAVI.

   For di aña 2016, e garoti blanco ku strepi cora a haya reconocemento internacional como un simbolo oficial di accesibilidad. E persona cu ta uza e garoti ta visualmente incapacita y tin preferencia legal y derecho pa move libremente den espacio publico: caminda, banco, aeropuerto, supermercado, edificionan gubernamental y mas. Ciudadanonan mester ta consciente di esey y mustra respet y empatia. Esnan cu ta cana cu e garoti, mester di asistencia ora necesario.

   Señora Wernet-Kelly a remarca cu FAVI ta pone enfasis riba e importancia di reconocemento di e garoti blanco cu strepi cora den comunidad, pa proteha e usuarionan visualmente incapacita mientras nan ta riba caminda. E simbolo di e garoti ta fundamental pa aumenta siguridad y respet pa personanan cu tin un discapacidad visual.

   Segun señora Wernet-Kelly Actualmente, e mayoria di clientenan di FAVI ta hende muhe, y compara cu 20 aña pasa, e clientenan nobo ta cuminsa di un edad mas hoben. Mas hende hoben ta busca asistencia na FAVI, cu ta refleha un cambio positivo den mentalidad di e comunidad. FAVI mes a bira mas diversifica y ta ofrece apoyo personalisa, segun e necesidadnan di cada persona — incluyendo ayudo pa sigui studia, forma parti di e comunidad, y ta mas activo den bida diario.

   FAVI ta traha riba plannan innovativo pa sigui amplia su servicio y yuda mas hende, cu un impacto positivo pa Aruba henter.