Siman bunita di actividadnan en conexion cu 40 aniversario di Club Kibrahacha

Coordinador di actividadnan na Club Kibrahacha, Señora Lucia Hoek

ORANJESTAD (AAN):  Coordinador di actividadnan na Club Kibrahacha, Señora Lucia Hoek, den un entrevista recien a elabora riba e siman bunita di actividadnan cu ta andando en conexion cu 40 aniversario di Club Kibrahacha dia 9 di september. ‘Na caminda pa e celebracion’ ta e nomber cu nan a duna pa e siman aki y e celebracion grandi mes lo tuma luga awe, diabierna 12 di september. Esaki lo ta un fiesta grandi na unda ta bay tin diferente actividad y ambiente dushi p’e miembronan. 

Na caminda pa e celebracion di 40 aña di Club Kibrahacha a cuminsa diamars 9 di september hunto cu e miembronan presente, cu cortamento di bolo y cantamento y a supla bela pidiendo tur bon deseo pa Club Kibrahacha sigui florece y bira mas grandi den futuro. Despues a hunga e wega ‘Bon Cu Ne’. 

Diaranson tawata tin varios actividad pa miembronan haya oportunidad pa test pa presion y sucu cu enfemeronan di Ambulance Dienst y IMSAN. Na Aruba Vision Center miembronan por a check presion di wowo. Y e cabayeronan a haya un corta di cabey door di barbero Alex cu a bay e Club pa haci esaki posibel y señora Rosa a presenta pa haci cabey di e damanan. 

Mientras tur esaki tawata tumando luga, e grupo musical Kibrahacha Boys tawata deleita esnan presente cu dushi musica. Diahuebs e actividadnan a sigui cu ambiente musical y un biaha mas Ambulance Dienst y IMSAN tawata presente pa haci test di presion y sucu.

Señora Hoek a expresa cu e vison di Club Kibrahacha ta pa haya mas bus y lo ta trahando duro pa e meta aki pa purba soluciona e demanda cu tin di ciudadanonan cu kier bira miembro di Club Kibrahacha. E intencion ta pa busca mas miembro y mas boluntario pa asina haci Club Kibrahacha mas grandi pa yuda combati e soledad di hopi adulto mayor. 

Pabien ta bay na Club Kibrahacha cu boso 40 aña brindando alegria, amor, pasenshi na nos adultonan mayor. Un gradicimento na cada trahador y boluntario cu e trabou cu nan ta haci pa trece felicidad y kibra e soledad di nos ciudadanonan.