Relacionista Publico di DIMP, Meverly Romano:
ORANJESTAD (AAN)—Señora Meverly Romano, Relacionista Publico di Departamento di Impuesto (DIMP), den entrevista cu Matutino DIARIO a indica, cu nan a caba cu mayoria di automobilistanan, nan a wordo yuda, a percura pa nan por a haya nan plachinan, y aworaki desde 3 di September te cu 31 di Januari 2026, ta resta 1.616 cita cu DIMP tin cu atende.
E mayoria ta den September, el a reitera, y loke ta resta di October te cu Januari ta 80 cita. “Esaki ta e grupo di personanan cu nos a haci investigacion pasobra ta personanan cu no ta residente di Aruba, nan ta Mericano, Canades, Hulandes, cu ta bin pasa temporada di winter na Aruba. E ora ey, nan ta busca un plachi number tambe”, Meverly Romano a duna di conoce.
El a agrega cu tin personanan cu a haci un cita den October y DIMP a reschedule nan mas dilanti, na Augustus cu September, pero tin un grupo cu no kier pa DIMP manda nan cita mas dilanti y nan a manda nan mes bek na October.
“Tambe tin un grupo di personanan cu nan e-mail no ta corecto, nos kier a reschedule nan cita, pero debi cu nan e-mail no ta corecto nos a dicidi di yama nan nos a reschedule na e prome siman di September; un grupo grandi nos a logra y un grupo cu nos no a logra sea cu nan telefon no ta corecto of nan mes no tabata disponible”, señora Romano a indica.
Romano a menciona cu a resta un grupo di 54 cita den October y te cu 1 di Januari DIMP tin en total, 80 cita pa atende.
Despues di 30 di September DIMP por bisa cu nan a cumpli cu Aruba, cu su automobilistanan, cu nan contribuyentenan.
“Loke ta resta pa parti, ta di un grupo cu falta pa paga nan impuesto di aña 2025. Nos tin un total di 7.554 number cu no tin pago di impuesto 2025 riba dje. Personanan cu si a paga, pero no tin nan seguro na orden, personanan cu a paga solamente e prome mita di impuesto 2025 pero no a paga e di dos mita, tampoco lo ricibi nan plachinan tanten cu no tin e di dos termino paga”, Meverly Romano, PR di DIMP, a señala.
